Staðardagskrá 21 – Hvað er nú það?

Staðardagskrá 21 er í raun velferðaráætlun sem sveitarfélög vinna að, hvert um sig, þar sem horft er á þróun samfélagins til langs tíma og sett niður áætlun um þau verkefni sem þarf að hrinda í framkvæmd.

Nánar tiltekið er hér um að ræða áætlun um þau verk sem vinna þarf í hverju samfélagi um sig til að nálgast markmiðið um sjálfbæra þróun á 21. öldinni, þ.e.a.s. þróun sem tryggir komandi kynslóðum viðunandi lífsskilyrði.

Staðardagskrá 21 er með öðrum orðum heildaráætlun um þróun hvers samfélags um sig fram á 21. öldina. Áætlunin snýst ekki eingöngu um umhverfismál í venjulegum skilningi, heldur er henni ætlað að taka jafnframt tillit til efnahagslegra og félagslegra þátta.

Eftirfarandi fimm atriði hafa verið skilgreind sem meginþættir eða vegvísar fyrir Staðardagskrárstarfið:

·         Heildarsýn og þverfagleg hugsun

·         Virk þátttaka íbúanna

·         Hringrásarviðhorf

·         Tillit til hnattrænna sjónarmiða

·         Áhersla á langtímaáætlanir

Þetta verkefni hefur verið í gangi hér á landi frá árinu 1998 og hefur meirihluti íslenskra sveitarfélaga tekið þátt í þessu starfi.

Sveitarstjórn Flóahrepps hefur ákveðið að taka þátt í þessu verkefni og móta þar með velferðaráætlun sveitarfélagsins til langs tíma.

Skipuð hefur verið sérstök nefnd sem stýrir vinnunni en lögð er mikil áhersla á þátttöku almennings í sveitarfélaginu og íbúarnir komi sínum hugmyndum og sjónarmiðum á framfæri í vinnunni.

Val á málaflokkum – fimm veigamestu!??

 Eins og komið hefur fram er að hefjast vinna við mótun Staðardagskrár 21 fyrir Flóahrepp. Um er að ræða velferðaráætlun þar sem horft er á þróun samfélagsins til langs tíma og sett niður áætlun um þau verkefni sem þarf að hrinda í framkvæmd.

Staðardagskrárnefnd sér um undirbúninginn og hefur ákveðið að leita til lesenda vefjarins www.floahreppur.is um að taka þátt í könnun um hvaða málaflokka þeir vilja að teknir verði fyrir í Staðardagskránni. Hér að neðan eru hugmyndir að málaflokkum sem hugsanlegt er að taka fyrir. Lesendur eru beðnir um að tilgreina 5 málaflokka sem þeir vilja sjá fjallað um og senda val sitt með tölvupósti á netfangið: sd21.floa@gmail.com  fyrir 15. janúar 2009.

Niðurstöður úr þessari könnun verða hafðar til hliðsjónar við endanlegt val á málaflokkum.

Allar nánari upplýsingar veitir Hafsteinn Hafliðason, formaður Staðardagskrár­nefndarinnar í síma 4823346 eða netfang: sd21.floa@gmail.com

Allir eru hvattir til að taka þátt og hafa þannig áhrif á mótun samfélagsins sem við búum í!

Hugmyndir að málaflokkum, merktu aðeins við þá 5 sem þér finnst mestu máli skipta: