Saga félagsins
Ungmennafélagið Baldur var stofnað 8. júni 1908 og starfaði af krafti fyrstu árin. Það átti erfitt uppdráttar á tímabilinu 1916-1927, lá starf þesss þá niðri. Á þeim tíma vantaði gífurlega samkomuhús en árið 1927 var reist félagsheimili í sveitinni sem gefið var nafnið Þingborg og varð það til þes að félagið tók til starfa aftur og hefur starfað óslitið síðan. Félagið starfar nú eins og áður undir slagorðinu:  „Ræktun lýðs og lands“. Einbúi er landspilda í eigu félagsins. Þetta er útivistarsvæði í Oddgeirshólaklettum sem Guðmundur Sigurðsson í Austurkoti gaf félaginu árið 1931. Ungmennafélagar hafa unnið af kappi við að gera svæðið að fallegu íþrótta- og útivistarsvæði m.a. með hleðslu palla og gróðursetningu skjólbelta.

Íþróttir
Eitt megin viðfangsefni félagsins er að halda uppi öflugu íþróttastarfi. Frjálsar íþróttir eru mest stundaðar innan félagsins.   Æfingar eru 1x í viku og skipt er í eldri og yngri flokka. Á veturna eru æfingar í félagsheimilinu Þingborg en á sumrin eru þær í Einbúa.   Á sumrin eru einnig fótboltaæfingar 1x til 2x í viku og mæta þá krakkar og fullorðnir og spila sér til gamans. Ýmis mót eru haldin bæði á veturna og sumrin s.s. Þingborgarmót, Flóamót og Baldurs- og Skeiðamót. Mótin eru fyrst og fremst haldin til að efla kynni milli félaga og allir hafi gaman af. Skákæfingar eru stundaðar af og til innan félagsins. Einnig hefur verið stundaður körfubolti, glíma, borðtennis og fleiri greinar.

Félagsmál
Mikið er lagt upp úr að efla félagslegan þroska einstaklingsins.  Umf Baldur sér um árlegt þorrablót hér í sveitinni. Það er haldið í samvinnu við nágranna okkar í Sandvíkurhreppi. Venja er annálar sveitanna séu samdir og fluttir af nefndarfólki. Á vorin heldur félagið hestamannakaffi. Þar kemur fólk ríðandi, bílandi eða gangandi og kaupir sér kaffimeðlæti og skrafar. Oft myndast skemmtilegar umræður yfir kakóbollanum.   Hestamannakaffi og þorrablót eru stærstu fjáraflanir félagsins. Fleiri samkomur eru haldnar s.s. vorfagnaður, þar er slegið á létta strengi og vorinu fagnað. Haldin er hátíð á þjóðhátíðardaginn.  Það var fyrst gert 1957. Þar er ræðumaður, fjallkona og farið í hina ýmsu leiki. Þrettándagleði er haldin á hverju ári með brennu, flugeldasýningu og skemmtidagskrá. Oft hafa verið haldin námskeið, svo sem dansnámskeið og félagsmálanámskeið. Oft eru sett upp leikrit, stundum í samstarfi við nágrannafélögin. Gönguferðir, útilegur, skemmtiferðir og samkomuhald af ýmsu tagi eru dæmi um sívinsæl verkefni.