Ársreikningur Flóahrepps fyrir árið 2009 var lagður fram til fyrri umræðu á fundi sveitarstjórnar Flóahrepps 17. mars s.l.
Samkvæmt reikningi er hagnaður um 13 mkr. meiri en áætlun gerði ráð fyrir eða 33,5 mkr. í stað 20. mkr.
Á fundi var starfsfólki skrifstofu þökkuð vel unnin störf við rekstur skrifstofunnar.
Föstudaginn 12. mars s.l. heimsótti hluti sveitarstjórnar og fræðslunefndar ásamt sveitarstjóra leik- og grunnskóla Flóahrepps. Skólastjórar skólanna kynntu starfið og fóru yfir ýmsar breytingar sem gerðar hafa verið á kjörtímabilinu, bæði hvað varðar innra starf og útlitsbreytingar. 
Upplestrarkeppni Flóaskóla var haldin í dag en hún er undankeppni fyrir Stóru upplestrarkeppnina á okkar svæði sem haldin verður í Félagslundi þann 17. mars nk. Það voru nöfnurnar Helga Leifsdóttir og Helga Margrét Höskuldsdóttir sem voru valdar úr hópi 7. bekkinga sem fulltrúar skólans í stóru keppnina og Viðar Janus Helgason er varamaður þeirra. Dagana 2.-23. febrúar tóku nemendur og starfsfólk Flóaskóla þátt í átaks- og hvatningarverkefni ÍSÍ, Lífshlaupið. Flóaskóli gerði sér lítið fyrir og lenti í 1. sæti í flokk skóla með 70-150 nemendur.
Álagningaseðlar berast á næstu dögum til eigenda fasteigna í Flóahreppi en eindagi fyrstu greiðslu er um mánaðarmótin mars/apríl.
Í Vatnsholti er búinn að vera köttur í heimsókn í um 3 vikur. Þetta er gæfur köttur, vanur mönnum og hrossum. Upplýsingar eru í síma 486-3404.Sveitarstjórn hefur samþykkt að veita styrki til löglegra framboða í Flóahreppi vegna næstu sveitarstjórnarkosninga, kr. 70.000 hvert.
Einnig fá framboðslistarnir félagsheimili sveitarfélagsins endurgjaldslaus fyrir íbúafundi til kynningar á sínum málefnum í samráði við húsverði félagsheimilanna.