Þakkir og hvatning frá sveitarstjóra Flóahrepps dags. 24. mars 2020.
Við förum nú í gengum sérstakt tímabil einstakra aðstæðna í heiminum öllum.
Engan hefði órað fyrir því á þeim tíma sem skipulag skólaársins fyrir veturinn 2019 – 2020 var til umræðu eða við fjárhagsáætlanagerð fyrir árið 2020 að samfélagið og við öll hvert og eitt sem einstaklingar ættum eftir að standa frammi fyrir áskorun sem þessari.
Áskorun sem felst í því að við þurfum mörg að gjörbreyta lífsháttum að minnsta kosti tímabundið, stjórnendur skólanna að endurskipuleggja skólastarf jafnvel daglega. Allir viðbragðsaðilar að rýna ný og ný gögn og taka nýjar ákvarðanir út frá þeim jafnóðum.
Ég vil þakka ykkur öllum fyrir að taka tilmæli almannavarna og sóttvarnarlæknis alvarlega, þannig komumst við í gengum þetta án þess að yfirkeyra heilbrigðiskerfið okkar og okkar góða starfsfólk í heilbrigðisþjónustu. Starfsmenn Flóahrepps og allra stofnana sveitarfélasins takmarka alla samveru og vinna í aðskildum rýmum. Öll rými og skólabílar eru þrifin með sérstöku tilliti til smitvarna.
Þakkir færi ég líka viðbragðsteyminu hjá Flóahreppi og öllu okkar góða starfsfólki fyrir að taka þátt í endurskipulagningu á öllu starfi og fyrir að vera tilbúin til þess að leysa öll þau mál jafnóðum sem upp koma. Nemendur Flóaskóla sem fá í auknu mæli fjarkennslu þar sem þarf að treysta á samskiptaforrit og samfélagsmiðla takk fyrir dugnaðinn ykkar og æðruleysið. Kæru foreldrar takk fyrir að hjálpa okkur öllum að leysa þetta verkefni saman. Nemendur Krakkaborgar eru margir heima en um helmingur er í leikskólanum. Takk kæru stjórnendur og starfsmenn fyrir ykkar framlag.
Velferðarþjónustan verður í sambandi við þjónustuþega varðandi allar hugsanlegar breytingar á þjónustu. Sumir hafa valið að afþakka þjónustu um óákveðinn tíma til þess að forðast smithættu. Sérstakar ráðstafanir verða gerðar gagnvart forgangshópum.
Sólin hækkar á lofti dag frá degi og það eru hættar að vera gular, appelsínugular og rauðar viðvaranir í veðurkortunum. Við eigum fallegt land sem gott er að njóta. Nýtum það til útiveru og hreyfingar, hlúum að vinum og nágrönnum í gegnum síma og samskiptamiðla. Verum sérstaklega varkár ef við verðum veik og sækjum okkur upplýsingar í gegnum síma og netmiðla.
Í viðbragðsáætlun Flóahrepps sem deilt er á heimasíðu sveitarfélagsins er að finna helstu símanúmer viðbragðsaðila.
Eydís Þ. Indriðadóttir, sveitarstjóri.