Bestu þakkir fyrir gagnlegar upplýsingar sem hafa borist til okkar um veður og færð. Snjómokstur er undir yfirumsjón Vegagerðarinnar og í gildi er undirritaður samningur við verktaka og sveitarfélagið. Vegagerðin greiðir helming af mokstri á ákveðnum leiðum 2 daga í viku. Annar kostnaður fellur á sveitarfélagið. Allar upplýsingar um færð eru teknar saman og þeim komið til Vegagerðarinnar sem fylgist með því hvar verktakarnir eru hverju sinni. Mikil ófærð er búin að vera undanfarna 2 sólarhringa. Allir hafa lagt sig fram um að opna sem flestar leiðir en þegar snjómagnið er jafn mikið og nú er raunin þá er færð fljót að spillast þar sem búið er að opna, því stöðugt bætir í. Áhersla hefur verið lögð á að halda leiðum opnum. Vegalengdir innan sveitarfélagsins eru miklar og því þarf fólk að sýna þolinmæði og í sumum tilfellum að breyta sínum áætlunum meðan ástandið er svona. Við vonum að þið sýnið þessu skilning. Það er verið að fullnýta bæði mannskap og tæki. Bið ykkur að hlusta eftir veðurspá fyrir seinnipart föstudags því það er hreinlega ekki útlit fyrir neitt ferðaveður og ég bið ykkur að gera viðeigandi ráðstafanir samkvæmt því. Mokstur gæti legið niðri á meðan veðrið gengur yfir og töluverðan tíma tekur að opna allar leiðir aftur.
Sveitarstjóri Flóahrepps