Þingborg er eitt af þremur félagsheimilum Flóamanna og þar eru skrifstofur sveitarfélagsins til húsa. Félagsheimilið Þingborg er leigt út fyrir hópa, salur, eldhús og tjaldstæði. Húsvörður félagsheimilisins er Ingibjörg Einarsdóttir á Langstöðum. Leikskólinn Krakkaborg stendur við hliðina á félagsheimilinu. Í sumar verður lokið við frágang leikskólalóðarinnar þannig að aðkoma að leikskólanum verður öll hin myndarlegasta. Þar verða nú að loknum sumarleyfum 45 börn og 17 starfmenn. Gamla Þingborg stendur við Suðurlandsveginn austan við meginskurð Flóaáveitunnar þar sem hann liggur undir Þjóðveg eitt. Gamla Þingborg er í göngufæri, frá Félagsheimilinu Þingborg, í gegnum svæði Skógræktarfélags Hraungerðishrepps. Þar eru starfandi handverkslistamenn og opið alla daga vikunnar. Þingborgarhópurinn sem á næsta ári fagnar 25 ára starfsafmæli hefur frá upphafi starfað í Gömlu Þingborginn og sérhæft sig í vandaðri vinnslu á íslenskri ull. Einnig er starfandi þar glerlistakonan Fanndís Huld Valdimarsdóttir. Opnunartími er auglýstur á heimasíðum þessara listamanna. Á Lambastöðum rétt vestan áveituskurðar er svo rekin myndarleg ferðaþjónsuta. Þar er hægt að fá gistingu ásamt morgunverði. Á myndinni sem tekin er í júlí 2015 af Ólafi Sigurjónssyni í Forsæti sést vel yfir Þingborg, leikskólann Krakkaborg, Lambastaði, skógræktina Gömlu Þingborg, Skeggjastaði býli þar sem stundaður er hefðbundinn blandaður búskapur og kirkjustaðinn Hraungerði þar sem einnig er búið blönduðu búi.