Ægir Atlason, íþróttamaður Flóahrepps 2012
Ægir Atlason fimleikamaður var kjörinn íþróttamaður Flóahrepps árið 2012 við hátíðlega athöfn í Þingborg föstudaginn 31. maí s.l.
Það voru formenn ungmennafélaganna Baldurs, Vöku og Samhygðar ásamt æskulýðs- og tómstundanefnd Flóahrepps sem völdu Ægi íþróttamann ársins.
Ægir er 14 ára fimleikamaður og kemur úr Fimleikadeild Selfoss. Á árinu hefur hann keppt með blönduðu liði Selfoss sem og karlaliði Selfoss en einnig keppti hann með unglingalandsliði Íslands í blönduðum flokki á Evrópumótinu í Árósum í Danmörku 19.-20.október 2012.
Ægir er nemandi í Flóaskóla en byrjaði ungur að æfa með Fimleikadeild Selfoss og sýndi fljótt hvers megnugur hann er. Hann hefur frá því hann byrjaði að æfa tekið jöfnum framförum og verið fljótur að tileinka sér ný stökk og æfingar. Hann hefur ávallt verið í fremstu röð í sínum aldursflokki og leitt hópinn sinn áfram í gegnum keppnir.
Á Evrópumótinu í haust var hann yngstur í landsliðinu en aðrir drengir í liðinu voru 17 ára. Hann gaf þeim þó ekkert eftir og kom sér í 3 keppnisumferðir á dýnu en aðeins 3 strákar stökkva hverja umferð ásamt 3 stúlkum. Hann sló sem sagt þeim eldri við í dýnustökkinu. Hann var svo fyrsti varamaður inn í allar umferðir á trampólíninu. Í dansinum stendur hann sig einnig mjög vel og er fljótur að tileinka sér góðar æfingar. Liðið hafnaði í 4.sæti í samanlögðum stigum.
Ægir æfir vel og vill fá krefjandi verkefni á æfingum sem skilar honum miklum erfiðleika í stökkum þrátt fyrir ungan aldur. Hann er metnaðargjarn og vill ná fullkomnun í því sem hann gerir. Hann mun á næstu árum verða enn betri en sagt er að fimleikamenn toppi eftir tvítugt. Ægir stefnir ótrauður á að komast í næsta unglingalandslið Íslands í hópfimleikum og verður gaman að fylgjast með honum þá þar sem hann mun verða enn sterkari með reynsluna frá EM 2012.
Ægir er sannarlega vel að kjörinu kominn eins og sjá má á ofangreindu yfirliti.