Á Byggðasafni Árnesinga verður safnhelgin 4.-6.nóvember tileinkuð ljósmyndum úr Árnessýslu. Í Húsinu á Eyrarbakka verður ljósmyndasafn Þorsteins Jósepssonar, ljósmyndara, til sýnis og greininga.
Gestir eru hvattir til að koma og hjálpa okkur að finna staðinn og fólkið á ljósmyndunum. Þorsteinn (1907-1967) var mikilsvirtur landslagsljósmyndari sem ferðaðist um allt Ísland í ljósmyndaleiðöngrum sínum. Eftir hann liggja einnig mikið af þjóðlífmyndum. Alls verða um 500-600 myndir á sýningunni sem er haldin í samstarfi við Ljósmyndasafn Íslands í Þjóðminjasafni.
Ýmislegt annað verður á döfinni. Á laugardaginn kl. 14 verður hljómsveitin Korka með tónleika í Húsinu og á sunnudaginn verður dagskrá tileinkuð ljósmyndum. Flutt verður erindi um Þorstein Jósepsson og einnig mun Gunnar Marel Hinriksson kynna nýútkomna ljósmyndabók sína Selfoss. Blokkflautukvartett Rangæinga spilar kaffihúsatónlist milli erinda.
Safnið er opið föstudag- sunnudags kl. 13-18 og aðgangur er ókeypis.