Fundargerð 101. fundar sveitarstjórnar Flóahrepps
Fundarstaður: Þingborg
Fundardagur: Miðvikudagur 1. júní 2011
Fundartími: 20:00 – 00:15
Fundarmenn:
Aðalsteinn Sveinsson, oddviti
Árni Eiríksson
Elín Höskuldsdóttir
Hilda Pálmadóttir
Svanhvít Hermannsdóttir
Margrét Sigurðardóttir, sveitarstjóri
Aðalsteinn Sveinsson setti fund og Margrét Sigurðardóttir ritaði fundargerð.
Samþykkt að fundargerð verði rituð á tölvu sbr. 23. gr. sveitarstjórnarlaga.
Sveitarstjórn samþykkir að taka fyrir önnur mál.
Á fundi liggur frammi:
Ársreikningur Sorpstöðvar Suðurlands fyrir árið 2010, ársskýrsla Flóaskóla fyrir skólaárið 2010-2011 og ársskýrsla leikskólans Krakkaborgar fyrir skólaárið 2010-2011.
Dagskrá:
- Skipulagsmál
a) Fundargerð skipulags- og byggingarnefndar uppsveita Árnessýslu og Flóahrepps
Lögð fram fundargerð skipulags- og byggingarnefndar uppsveita Árnessýslu og Flóa dags. 26. maí 2011. Einnig liggur fyrir fundi samþykkt um sameiginlega skipulags- og byggingarnefnd Bláskógabyggðar, Grímsnes- og Grafningshrepps, Hrunamannahrepps, Skeiða- og Gnúpverjahrepps og Flóahrepps um embættisafgreiðslur byggingarfulltrúa og skipulagsfulltrúa skv. skipulagslögum nr. 123/2010 og lögum um mannvirki nr. 160/2010.
Sveitarstjórn fjallar um lið nr. 7, nr. 9, nr. 12, nr. 29, nr. 30 og nr. 31.
Varðandi lið 7 þá samþykkir sveitarstjórn að heimila byggingu 40 fm húss í landi Hamars, land 2 í samræmi við fyrirliggjandi gögn, samkvæmt 1. tl. 57. gr. skipulagslaga nr. 123/2010. Fyrir fundi liggur samþykki aðliggjandi landeigenda um fyrirhugaðar byggingarframkvæmdir.
Varðandi lið nr. 9 þá staðfestir sveitarstjórn fyrirliggjandi samþykkt.
Liðir nr. 12, 29, 30 og 31 eru einnig staðfestir.
Jafnframt liggur fyrir fundi afgreiðslufundur byggingarfulltrúa dags. 28. apríl 2011. Sveitarstjórn fjallar um lið nr. 18 og staðfestir hann.
Einnig liggur fyrir fundi afgreiðslufundur byggingarfulltrúa dags. 18. maí 2011.
Sveitarstjórn fjallar um lið nr. 22 og staðfestir hann.
Samþykkt með 5 atkvæðum.
- Kjör oddvita og varaoddvita Flóahrepps 2011-2012
Skrifleg kosning um oddvita og varaoddvita fer fram.
Aðalsteinn Sveinsson var kosinn oddviti með 5 atkvæðum.
Árni Eiríkson var kosinn varaoddviti með 5 atkvæðum.
Aðalsteinn og Árni þakka traust sveitarstjórnarfulltrúa.
- Kjör í nefndir sbr. A lið 51. gr. samþykkta um stjórn og fundarsköp Flóahrepps
Samkvæmt 51. gr. samþykkta um stjórn og fundarsköp Flóahrepps skal kjósa ár hvert til setu á aðalfund Samtaka sunnlenskra sveitarfélaga, á aðalfund Atvinnuþróunarfélags Suðurlands, á aðalfund Skólaskrifstofu Suðurlands, á aðalfund Heilbrigðiseftirlits Suðurlands og á aðalfund Sorpstöðvar Suðurlands.
Sveitarstjórn samþykkir eftirfarandi:
Aðalfundur Samtaka sunnlenskra sveitarfélaga:
Aðalmenn: Aðalsteinn Sveinsson, Árni Eiríksson og Svanhvít Hermannsdóttir.
Varamenn: Hilda Pálmadóttir, Elín Höskuldsdóttir og Gauti Gunnarsson.
Aðalfundur Atvinnuþróunarfélags Suðurlands
Aðalmenn: Aðalsteinn Sveinsson, Árni Eiríksson og Svanhvít Hermannsdóttir.
Varamenn: Hilda Pálmadóttir, Elín Höskuldsdóttir og Gauti Gunnarsson.
Aðalfundur Skólaskrifstofu Suðurlands
Aðalmenn: Aðalsteinn Sveinsson, Árni Eiríksson og Svanhvít Hermannsdóttir.
Varamenn: Hilda Pálmadóttir, Elín Höskuldsdóttir og Gauti Gunnarsson.
Aðalfundur Heilbrigðiseftirlits Suðurlands
Aðalmenn: Aðalsteinn Sveinsson, Árni Eiríksson og Svanhvít Hermannsdóttir.
Varamenn: Hilda Pálmadóttir, Elín Höskuldsdóttir og Gauti Gunnarsson.
Aðalfundur Sorpstöðvar Suðurlands
Aðalmaður: Margrét Sigurðardóttir.
Varamaður: Aðalsteinn Sveinsson.
Samþykkt með 5 atkvæðum.
- Breyting á samþykkt um stjórn og fundarsköp Flóahrepps
Lögð fram til fyrri umræðu, drög að breytingum á lið B 3, 51. gr. samþykktar um stjórn og fundarsköp Flóahrepps, svohljóðandi:
Sameiginleg félagsþjónusta sjö sveitarfélaga í Árnessýslu. Einn fulltrúi og einn til vara til setu í yfirstjórn sameiginlegrar félagsþjónustu sveitarfélaganna Ölfuss, Hveragerðisbæjar, Hrunamannahrepps, Bláskógabyggðar, Grímsness-og Grafningshrepps, Skeiða- og Gnúpverjahrepps og Flóahrepps samkvæmt samningi þar að lútandi. Sá sem kjörinn er í yfirstjórn hefur umboð til þess að skipa fulltrúa og varafulltrúa í eina sameiginlega velferðarnefnd á starfssvæði félagsþjónustu sveitarfélaganna í samræmi við ákvæði samstarfssamnings og á grundvelli 2. mgr. 7. gr. laga nr. 40/1991, um félagsþjónustu sveitarfélaga. Fulltrúar í sameiginlegri velferðarnefnd eru fimm auk jafnmargra varamanna og koma þrír af starfssvæði Sveitarfélagsins Ölfuss og Hveragerðisbæjar og tveir af starfssvæði sveitarfélaga í Uppsveitum Árnessýslu og Flóahrepps.
Einnig lögð fram til fyrri umræðu, drög að breytingum á lið B 4, 51. gr. samþykktar um stjórn og fundarsköp Flóahrepps, svohljóðandi:
Jafnréttisnefnd. Sameiginleg velferðarnefnd fer með verkefni jafnréttisnefndar samkvæmt ákvæðum laga um jafna stöðu og jafnan rétt kvenna og karla nr. 10/2008.
Vísað til seinni umræðu.
Samþykkt með 5 atkvæðum.
- Breyting á innkaupareglum Flóahrepps
Lögð fram drög að breytingum á Innkaupareglum Flóahrepps.
Breytingin gerir ráð fyrir nýrri 18. gr. sem fjallar um tengda aðila og er svohljóðandi:
„Almennt eru tengdir aðilar aðal- og varamenn í sveitarstjórn auk æðstu stjórnenda sveitarfélagsins. Makar þessara aðila, ófjárráða börn og aðrir fjárhagslega háðir einstaklingar falla einnig hér undir ásamt fyrirtækjum í eigu eða undir stjórn þessara aðila.
Sveitarfélagið heldur skrá yfir tengda aðila og ber sveitarstjóri ábyrgð á að uppfæra skrána.
Viðskipti sveitarfélagsins við tengda aðila skulu vera á sömu forsendum og þegar um óskylda aðila er að ræða, s.s. varðandi einingaverð. Að öðru leyti gilda ákvæði 19. gr. um hæfis- og siðareglur.“
Einnig fellur út ákvæði í 17. gr. svohljóðandi:
„Innkauparáð leiðbeinir um gerð krafna um fjárhagsstöðu og tæknilega getu í útboðsgögnum og aðstoðar við mat á því hvort skilyrðum sé fullnægt að þessu leyti“ og ákvæði í 19. gr. svohljóðandi:
„Sé bjóðandi í verk tengdur aðili, þ.e. fulltrúi í sveitarstjórn, varamaður í sveitarstjórn, sveitarstjóri, makar þeirra og einstaklingar sem eru háðir þeim fjárhagslega ásamt fyrirtækjum í þeirra eigu eða eru undir þeirra stjórn.“
Samþykkt með 5 atkvæðum.
- Samningar um skólaakstur
Lagðir fram til staðfestingar, samningar um skólaakstur til eins árs við Sigurð Ólafsson, Guðrúnu Jónsdóttur, Sigurð Inga Sigurðsson, Kristján Einarsson og Flakk ehf.
Staðfest með 5 atkvæðum.
- Samkomulag um dvalarpláss í dagdvölum Árblik og Vinaminnis
Lögð fram drög að samkomulagi við sveitarfélagið Árborg um dagvistun í Árblik og Vinaminni fyrir íbúa Flóahrepps sem hafa náð 67 ára aldri og/eða eru með heilabilunargreiningu.
Samþykkt með 5 atkvæðum.
- Húsaleigusamningar, Gamla Þingborg
Lögð fram drög að húsaleigusamningum við Lækjarbúið ehf og Ullarvinnsluna ehf um afnot af húsnæði Gömlu Þingborgar.
Sveitarstjórn samþykkir fyrirliggjandi húsaleigusamninga og felur sveitarstjóra að skrifa undir þá fyrir hönd sveitarfélagsins.
Samþykkt með 5 atkvæðum.
- Erindi frá nefndasviði Alþingis
Lagt fram erindi frá nefndasviði Alþingis dags. 18. maí 2011 þar sem óskað er eftir umsögn um frumvarp til laga um barnalög, 778. mál.
- Styrkbeiðni frá áhugamannahópi sem vinnur að ferða- og þjónustukorti fyrir Flóahrepp
Tekið fyrir erindi dags. 26. maí 2011 frá áhugamannahópi sem vinnur að ferða- og þjónustukorti fyrir Flóahrepp. Óskað er eftir styrk, allt að kr. 250.000 til verksins.
Sveitarstjórn tekur jákvætt í erindið en mun óska eftir frekari upplýsingum um verkefnið.
Samþykkt með 5 atkvæðum.
- Styrkbeiðni frá Skólahreysti
Tekin fyrir beiðni frá Skólahreysti dags. maí 2011 þar sem óskað er eftir styrk, kr. 50.000 til verkefnisins.
Sveitarstjórn samþykkir beiðnina.
Samþykkt með 5 atkvæðum.
- Styrkbeiðni frá Afli
Tekið fyrir erindi frá Afli, samtökum gegn kynferðis- og heimilisofbeldi á Norðurlandi dags. 4. maí 2011.
Sveitarstjórn hafnar erindinu.
Samþykkt með 5 atkvæðum.
- Yrpuholt
Lagður fram tölvupóstur frá Kristjáni Stefánssyni dags. 27. maí 2011 þar sem óskað er eftir því að fá framlengdan frest sem sveitarstjórn hafði áður veitt, til að ljúka kaupum á Yrpuholti.
Óskað er eftir fresti til loka júní.
Sveitarstjórn samþykkir að veita frest til 30. júní 2011 að því tilskyldu að hluti jarðarinnar, svokölluð stóðhestagirðing, verði afhentur 1. janúar 2012.
Jafnframt er samþykkt að gera leigusamning um þann hluta jarðarinnar samkvæmt bókun sveitarstjórnar frá 2. mars 2011 og sveitarstjóra falið að ganga frá samningi.
Samþykkt með 5 atkvæðum.
- Fundargerðir
a) Sveitarstjórnar Flóahrepps
Fundargerð sveitarstjórnar Flóahrepps dags. 4. maí 2011 lögð fram.
Varðandi lið 3 þá var tekið fyrir erindi frá Guðbjörgu Jónsdóttur og Gauta Gunnarssyni fyrir hönd Lækjarbúsins ehf.
Varðandi lið 13 a) þá samþykkir sveitarstjórn að fela oddvita að skrifa undir samstarfssamning um sameiginlegt starfssvæði félagsþjónustu uppsveita Árnessýslu og Flóahrepps.
Samþykkt með 5 atkvæðum.
b) Fræðslunefndar
Fundargerð fræðslunefndar dags. 24. maí 2011 lögð fram ásamt erindi frá Örlygi Karlssyni skólameistara Fjölbrautarskóla Suðurlands dags. 18. maí 2011 um greiðslu fyrir samningu prófa í Fsu og yfirferð þeirra, 5.000 kr. pr/nemanda í 10. bekkjum grunnskóla. Um er að ræða dönsku, ensku, íslensku og stærðfræði.
Sveitarstjórn samþykkir að greiða fyrir gerð prófa og yfirferð þeirra samkvæmt ofangreindu erindi frá Örlygi.
Einnig liggur fyrir fundi skóladagatal fyrir árin 2011-2012 og áætlun frá skólastjóra um innkaup og viðhald vegna nýbyggingar Flóaskóla og fjölgunar nemenda.
Samþykkt með 5 atkvæðum.
c) Félagsmálanefndar uppsveita Árnessýslu og Flóa
Fundargerð félagsmálanefndar uppsveita Árnessýslu og Flóa dags. 4. maí 2011 lögð fram til kynningar.
d) Æskulýðsnefndar
Fundargerð æskulýðsnefndar dags. 19. apríl 2011 lögð fram.
Varðandi lið 1, samstarfssamning Flóahrepps við ungmennafélögin Baldur, Samhygð og Vöku þá samþykkir sveitarstjórn að segja samningi upp sbr. 7. gr. samstarfssamnings og að uppsögn taki gildi 31. desember 2011.
Sveitarstjórn samþykkir einnig að gert verði fylgiskjal með samstarfssamningi milli Flóahrepps og ungmennafélaganna fyrir árið 2011 sem gerir ráð fyrir heildarstyrkfjárhæð kr. 1.400.000.
Sveitarstjórn setur skilyrði um að öll börn og unglingar hafi tök á að sækja um styrki, óháð félagaaðild að ungmennafélögum.
Sveitarstjóra falið að ganga frá fylgiskjali með samstarfssamningi.
Samþykkt með 5 atkvæðum.
e) Vinnuhóps um framkvæmdir við Flóaskóla
Fundargerðir vinnuhóps um framkvæmdir við Flóaskóla dags. 9. maí og 30. maí 2011 lagðar fram ásamt tilboði frá Á. Guðmundssyni í húsgögn fyrir kennslustofur viðbyggingar.
Sveitarstjórn samþykkir kostnað allt að kr. 1.500.000 í málningarvinnu vegna viðbyggingar.
Sveitarstjórn samþykkir einnig fyrirliggjandi tilboð frá Á. Guðmundssyni kr. 1.569.100.
Samþykkt með 5 atkvæðum.
f) Rekstrarstjórnar
Fundargerðir rekstrarstjórnar félagsheimila Flóahrepps dags. 8. mars, 23. mars og 13. apríl 2011 lagðar fram til kynningar.
g) Samráðsnefndar um vatnsveituframkvæmdir
Fundargerðir samráðsnefndar um vatnsveituframkvæmdir í Flóahreppi og Árborg dags. 4. maí og 19. maí 2011 lagðar fram til kynningar.
- Til kynningar:
a) 202. og 203. fundur Sorpstöðvar Suðurlands dags. 2. maí og 10. maí 2011 ásamt minnispunktum frá upplýsingafundi dags. 10. maí 2011
b) 133. fundur Heilbrigðisnefndar Suðurlands dags. 29. apríl 2011
c) Erindi frá Sambandi íslenskra sveitarfélaga dags. 27. apríl 2011
d) Erindi frá sveitarfélaginu Árborg dags. 3. maí 2011
e) Erindi frá Varasjóði húsnæðismála
f) Samkomulag Mennta- og menningarmálaráðuneytis og Sambands íslenskra sveitarfélaga um eflingu tónlistarnáms dags. 13. maí 2011
- Önnur mál:
a) Fundargerðir vinnuhóps um húsnæði leikskóla
Lagðar fram fundargerðir vinnuhóps um húsnæði leikskólans í Flóahreppi dags. 10. maí og 30. maí 2011 ásamt yfirliti yfir fjölda barna á leikskólaaldri 1991-2010. Einnig er lagt fram minnisblað frá Mannvit dags. 25. maí 2011 um möguleika í húsnæðismálum Krakkaborgar og frumkostnaðaráætlun.
Vinnuhóp falið að skoða framkvæmdarmöguleika með tilliti til stækkunar leikskóla.
Samþykkt með 5 atkvæðum.
a) Atvinnu- og umhverfisnefnd
Oddviti upplýsir að formaður atvinnu- og umhverfisnefndar hafi sagt af sér formennsku nefndarinnar.
Málinu frestað til næsta fundar.
Fleira ekki tekið fyrir og fundi slitið kl. 00:15