Fundargerð 96. fundar sveitarstjórnar Flóahrepps
Fundarstaður: Þingborg
Fundardagur: Miðvikudagur 2. mars 2011
Fundartími: 20:00 – 23:30
Fundarmenn:
Aðalsteinn Sveinsson, oddviti
Árni Eiríksson
Elín Höskuldsdóttir
Hilda Pálmadóttir
Svanhvít Hermannsdóttir
Margrét Sigurðardóttir, sveitarstjóri
Aðalsteinn Sveinsson setti fund og Margrét Sigurðardóttir ritaði fundargerð.
Samþykkt að fundargerð verði rituð á tölvu sbr. 23. gr. sveitarstjórnarlaga.
Sveitarstjórn samþykkir að taka fyrir önnur mál.
Dagskrá:
- Skipulagsmál
a) Aðalskipulag Flóahrepps 2006-2018 í fyrrum Villingaholtshreppi
Aðalskipulag Flóahrepps 2006-2018 í fyrrum Villingaholtshreppi sem samþykkt var af sveitarstjórn Flóahrepps 4. desember 2008 hefur verið staðfest af Umhverfisráðherra og býður birtingar í B-deild Stjórnartíðinda samkvæmt upplýsingum frá Umhverfisráðuneytinu.
Sveitarstjórn vill bóka eftirfarandi vegna ummæla sem fallið hafa í kjölfar dóms Hæstaréttar:
Sveitarstjórn Flóahrepps gerir alvarlegar athugasemdir við ummæli nokkurra alþingismanna og ráðherra í kjölfar dóms Hæstaréttar í máli Íslenska ríkisins gegn Flóahreppi. Fyrstu dagana eftir að dómur var upp kveðinn, féllu á Alþingi afar ómakleg og niðrandi ummæli í garð fyrrverandi sveitarstjórnar Flóahrepps og þeim ekki sæmandi sem þau viðhöfðu.
Talað var um mútur og það að kaupa sér skipulag. Þeim hinum sömu skal á það bent að mútur er refsivert athæfi. Íslensk orðabók skilgreinir orðið mútur á eftirfarandi hátt: „greiðsla fyrir vafasaman eða rangan verknað, peningar eða fjármunir bornir á e-n í hagnaðarskyni“.
Sveitarstjórnarmenn í Flóahreppi hafa ekki þegið mútur. Sveitarstjórn Flóahrepps beitti sér hinsvegar fyrir því að fá Landsvirkjun til þess að kosta samfélagsleg verkefni á svæðinu ef gera ætti ráð fyrir virkjun við Urriðafoss. Það hefur verið litið svo á það sé ekki hlutverk Landsvirkjunar sem opinbers fyritækis að þvinga virkjunarframkvæmdum upp á heimamenn án þess að það samfélag sem um ræðir hafi einhvern hag af framkvæmdinni. Þær fullyrðingar og dylgjur um að samið hafi verið um framkvæmdir og greiðslur beint til sveitarstjórnarmanna eru tilhæfulausar og með öllu ósannar.
Ákvörðun var tekin um að gera ráð fyrir virkjun á aðalskipulaginu m.a. til að koma í veg fyrir misræmi á svæðinu öllu en þau sveitarfélög sem koma að virkjunum í neðri hluta Þjórsár hafa nú þegar gert ráð fyrir þeim á sínu aðalskipulagi og tvö þeirra eru nýlega staðfest. Fyrrverandi sveitarstjórn vildi hins vegar tryggja íbúum Flóahrepps ákveðnar mótvægisaðgerðir ef af virkjun verður því lög um tekjustofna sveitarfélaga heimila eingöngu skattlagningu á stöðvarhúsbyggingar sem ekki koma til með að verða staðsettar í Flóahreppi.
Ljóst er að sitt sýnist hverjum um virkjun í neðri hluta Þjórsár en það að blanda sveitarstjórn og skipulagsmálum Flóahrepps inn í þá umræðu er með öllu fráleitt. Sveitarstjórn Flóahrepps fjallaði um Urriðafossvirkun á aðalskipulagi vegna þess að Landsvirkjun í umboði stjórnvalda fór fram á það. Fulltrúar Landsvirkjunar hafa jafnframt lýst því yfir að fyrirtækið fari ekki í virkjunarframkvæmdir nema í fullri sátt við ríksstjórn þannig að fullvíst má telja að það verður ekki sveitarstjórn Flóahrepps sem ákveður hvort virkjað verði eða ekki, hafi ríkt einhver misskilningur um það.
Það er alvarlegur hlutur þegar alþingismenn misnota aðstöðu sína á Alþingi til þess að bera út róg um fjarstadda sveitarstjórnarmenn. Sveitarstjórn Flóahrepps fer fram á það við forseta Alþingis að hann beiti sér fyrir því að þeir alþingismenn sem farið hafa offari í fullyrðingum í þingsal Alþingis, biðjist afsökunar og dragi þessi ummæli til baka. Verði það ekki gert er því beint til forseta að áminna viðkomandi þingmenn fyrir ummæli sín.
Ofangreind bókun er samþykkt af Aðalsteini Sveinssyni, Árna Eiríkssyni, Elínu Höskuldsdóttur og Hildu Pálmadóttur.
Svanhvít Hermannsdóttir greiðir atkvæði á móti samþykkt og gerir athugasemd við að í fundargögnum voru engin fylgiskjöl með lið 1 a) þar sem ræða á aðalskipulag Flóahrepps 2006-2018 í fyrrum Villingaholtshreppi og er það kannski dæmigert fyrir aðra málsmeðferð Aðalskipulagsins.
Svanhvít Hermannsdóttir bendir á að sveitarfélaginu hefur ekki tekist að benda á meint tjón sem hlotist hefur af seinkun aðalskipulagsins og meðan svo er hlýtur sú umræða að teljast áróður.
Svanhvít Hermannsdóttir ítrekar að ófaglegum vinnubrögðum hafi verið beitt við vinnslu aðalskipulagsins og það hafi verið keypt með mótvægisaðgerðum sem eru óskyldar virkjunarframkvæmdum.
b) Fundargerð skipulags- og byggingarnefndar uppsveita Árnessýslu og Flóahrepps
Lögð fram fundargerð skipulags- og byggingarnefndar uppsveita Árnessýslu og Flóa dags. 17. febrúar 2011 ásamt afgreiðslufundi byggingarfulltrúa dags. 2. febrúar 2011.
Sveitarstjórn fjallar um liði nr. 3, nr. 4, nr. 5, nr. 6 og nr. 20 í fundargerð skipulags- og byggingarnefndar og staðfestir þá.
Samþykkt með 5 atkvæðum.
Einnig lögð fram til kynningar, fundargerð stjórnar skipulags- og byggingarfulltrúaembættis uppsveita Árnessýslu og Flóahrepps bs. dags. 17. febrúar 2011.
c) Gjaldskrá fyrir leyfisveitingar og þjónustu skipulagsfulltrúa og byggingarfulltrúa
Lögð fram gjaldskrá fyrir leyfisveitingar og þjónustu skipulagsfulltrúa og byggingarfulltrúa uppsveita Árnessýslu og Flóahrepps dags. 10. febrúar 2011.
Fyrirliggjandi gjaldskrá samþykkt með 5 atkvæðum.
d) Beiðni um umsögn vegna lögbýlis, Hróarsholt
Tekin fyrir beiðni dags. 21. febrúar 2011 um breytingu á aðalskipulagi Flóahrepps 2006-2018 í fyrrum Villingaholtshreppi, í landi Hróarsholts.
Óskað er eftir því að 15,5 ha lands verði breytt úr frístundabyggð í landbúnaðarsvæði.
Sveitarstjórn frestar afgreiðslu þar sem Aðalskipulag Flóahrepps í fyrrum Villingaholtshreppi hefur ekki enn verið birt í Stjórnartíðindum.
Samþykkt með 5 atkvæðum.
- Framtíðarskipan félagsþjónustu í Uppsveitum og Flóa, Hveragerði og Ölfusi
Lögð fram tillaga að framtíðarskipan félagsþjónustu í uppsveitum og Flóa, Hveragerði og Ölfusi.
Sveitarstjórn samþykkir að fresta málinu til næsta fundar.
Samþykkt með 5 atkvæðum.
- Breyting á samþykktum um stjórn og fundarsköp Flóahrepps
Tekin til seinni umræðu, tillaga að breytingum á 51. gr. samþykktar um stjórn og fundarsköp Flóahrepps. Breytingin felst í að undir lið B, nr. 6 verði bætt við æskulýðs- og tómstundanefnd, þremur aðalmönnum og þremur til vara. Nefndin verði sveitarstjórn til ráðuneytis í æskulýðs- og tómstundamálum og hafi framkvæði að tillögugerð á því sviði.
Samþykkt með 5 atkvæðum.
Drög að samþykktum fyrir æskulýðs- og tómstundanefnd Flóahrepps
Tekin til seinni umræðu, drög að samþykktum fyrir æskulýðs- og tómstundanefnd Flóahrepps. Fyrir fundi liggur umsögn æskulýðs- og tómstundanefndar.
Sveitarstjórn samþykkir samþykktir fyrir æskulýðs-og tómstundanefnd með fyrirliggjandi tillögum nefndar.
Samþykkt með 5 atkvæðum.
- Umboð til Sambands íslenskra sveitarfélaga vegna kjarasamningsgerðar
Lagt fram samkomulag um kjarasamningsumboð fyrir Flóahrepp til handa Sambandi íslenskra sveitarfélaga.
Fyrirliggjandi samkomulag samþykkt með 5 atkvæðum.
- Erindi frá nefndarsviði Alþingis
Lagt fram erindi frá nefndasviði Alþingis dags. 25. febrúar 2011 þar sem óskað er eftir umsögn um þingályktun um mikilvægi fræðslu um kristni og önnur trúarbrögð og lífsviðhorf, 273. mál.
- Erindi frá reiðveganefnd
Lagt fram erindi frá reiðveganefnd Sleipnis þar sem óskað er eftir svari við beiðni um eina milljón króna fjárstuðning á næstu árum til reiðvegagerðar. Sveitarstjórn samþykkir að ákvörðun verði tekin fyrir hvert ár í fjárhagsáætlunarvinnu hverju sinni samkvæmt umsókn reiðveganefndar.
Reiðveganefnd óskar einnig eftir því að fundur verði haldinn með Vegagerð um lagningu reiðvegar með Villingaholtsvegi frá Önundarholtshæð að Suðurlandsvegi.
Sveitarstjórn tekur jákvætt í það.
Samþykkt með 5 atkvæðum.
- Styrkbeiðni frá Smalahundadeild
Lagður fram tölvupóstur frá Smalahundadeild Árnessýslu dags. 23. febrúar 2011 þar sem óskað er eftir 20.000 kr. styrk til námskeiðahalds og keppni fyrir smalahunda.
Sveitarstjórn samþykkir að veita Smalahundadeildinni 10.000 kr. styrk.
Samþykkt með 5 atkvæðum.
- Styrkbeiðni frá Bandalagi íslenskra skáta
Lögð fram beiðni frá Bandalagi íslenskra skáta dags. 11. febrúar 2011 þar sem óskað er eftir 30.000-60.000 kr. styrk til verkefnisins „Góðverk dagsins“.
Sveitarstjórn hafnar erindinu.
Samþykkt með 5 atkvæðum.
- Erindi frá stofnun Vilhjálms Stefánssonar
Lagt fram erindi frá stofnun Vilhjálms Stefánssonar dags. 9. febrúar 2011 þar sem óskað er eftir aðstoð við efnissöfnun vegna verkefnisins Fishernet (Trossan).
Brugðist verður við erindinu.
- Fundargerðir
a) Sveitarstjórnar Flóahrepps
Fundargerð sveitarstjórnar dags. 2. febrúar 2011 lögð fram.
b) Fræðslunefndar
Fundargerð fræðslunefndar dags. 24. febrúar 2011 lögð fram.
Sveitarstjórn staðfestir lið 1, áætlun á kostnaði vegna Olweus, 25% starfshlutfall sem mun falla undir starf deildarstjóra.
Varðandi lið 2, hljóðvist á deildum Krakkaborgar, samþykkir sveitarstjórn að fela umsjónarmanni fasteigna að kanna kostnað við að bæta hljóðvist á fullnægjandi hátt.
Samþykkt með 5 atkvæðum.
c) Félagsmálanefndar
Fundargerð félagsmálanefndar dags. 3. febrúar 2011 lögð fram.
Varðandi lið 11 vill sveitarstjórn taka undir áhyggjur félagsmálanefndar um niðurskurð löggæslu í Árnessýslu.
Samþykkt með 5 atkvæðum.
d) Æskulýðs- og tómstundanefndar Flóahrepps
Fundargerð æskulýðs- og tómstundanefndar dags. 15. febrúar 2011 lögð fram ásamt drögum að fjárhagsáætlun.
Sveitarstjórn staðfestir fyrirliggjandi drög um fjárhagsáætlun og lið 5 um ráðningu starfsmanns í tímabundið starf til vors.
Samþykkt með 5 atkvæðum.
e) Samráðsnefndar um vatnsveituframkvæmdir
Fundargerð samráðsnefndar um vatnsveituframkvæmdir dags. 2. febrúar 2011 lögð fram.
- Til kynningar:
a) 441. fundur SASS dags. 11. febrúar 2011
b) 127. fundur Skólaskrifstofu Suðurlands dags. 14. febrúar 2011
c) 298. fundur Atvinnuþróunarfélags Suðurlands dags. 7. febrúar 2011 ásamt minnisblaði
d) Aðalfundur Slökkvitækjaþjónustu Suðurlands ehf dags. 28. janúar 2011
e) 7. fundur framkvæmdaráðs Almannavarna Árnessýslu dags. 2. febrúar 2011
f) Tölvupóstu frá Vegamálastjóra dags. 16. febrúar 2011
g) Tillaga að breytingum á reglum um rekstur félagsheimilanna
h) Erindi frá veiðfélagi Þjórsár dags. 28. janúar 2011
i) Ályktun félagsmálanefndar uppsveita Árnessýslu og Flóa dags. 2. febrúar 2011
j) Erindi frá Umhverfisráðuneyti dags. 31. janúar 2011
k) Erindi frá SASS dags. 16. febrúar 2011
l) Erindi frá Ungmennafélagi Íslands dags. 28. janúar og 15. febrúar 2011
m) Fundur stjórnar SSKS dags. 15. febrúar 2011
n) Erindi frá Sambandi íslenskra sveitarfélaga dags. 14. febrúar 2011
o) Ályktun mótmælafundar „Samstaða um framhald tónlistarskólanna“ dags. 11. febrúar 2011
- Önnur mál:
a) Landleiga í Yrpuholti
Þrjú tilboð bárust í auglýsingu sveitarstjórnar um land til leigu í Yrpuholti. Sveitarstjórn samþykkir að taka hæsta tilboði, 36.000 kr. pr/mánuð í sjö mánuði.
Samþykkt með 5 atkvæðum.
b) Beiðni um umsögn vegna umsóknar um rekstur gististaðar í Höfðatúni
Lögð fram beiðni frá Sýslumanni á Selfossi dags. 24. febrúar 2011 um umsögn vegna umsóknar um rekstur gististaðar í Höfðatúni, Flóahreppi.
Sveitarstjórn samþykkir fyrirhugaðan afgreiðslutíma og staðsetningu.
Samþykkt með 5 atkvæðum.
c) Erindi frá valnefnd á íþróttamanni Flóahrepps fyrir árið 2010
Lagt fram erindi frá valnefnd á íþróttamanni Flóahrepps fyrir árið 2010 dags. 1. mars 2011. Valnefnd leggur til að haldin verði samkoma þar sem íþróttamaður ársins verði verðlaunaður.
Sveitarstjórn samþykkir að valnefnd ásamt sveitarstjóra útfæri viðburðinn nánar.
Fleira ekki tekið fyrir og fundi slitið kl. 23:30
Aðalsteinn Sveinsson, oddviti (sign)
Árni Eiríksson, varaoddviti (sign)
Elín Höskuldsdóttir, (sign)
Hilda Pálmadóttir, (sign)
Svanhvít Hermannsdóttir, (sign)
Margrét Sigurðardóttir, (sign)