Greinst hefur riða í einni kind á bænum Hurðarbaki í Flóahreppi. Grunur vaknaði vegna sjúkdómseinkenna í kindinni, sýni voru því send að Tilraunastöðinni á Keldum og við greiningu þar var staðfest riða. Matvælastofnun hefur tilkynnt ráðherra um málið og vinnur að undirbúningi niðurskurðar á fénu á Hurðarbaki og samningsgerð. Ekki hefur verið tekin ákvörðun um niðurskurð á fé frá öðrum bæjum en Hurðarbaki að svo stöddu.
Sömuleiðis er unnið að gagnasöfnun vegna faraldsfræðirannsóknar. Í því sambandi verða bændur sem eiga fé sem komið hefur í nána snertingu við féð frá Hurðarbaki, beðnir um að gefa frekari upplýsingar. Héraðsdýralæknir mun hafa samband við hlutaeigandi bændur. Tilgangur rannsóknarinnar er m.a. að meta hverjar líkur séu á að riðusmitið hafi borist á aðra bæi og hvaðan smitið geti hafa borist að Hurðarbaki, og meta í kjölfar þess hvort ástæða sé til víðtækari niðurskurðar.
Héraðsdýralæknir hefur sett farbann á fé sem er á Hurðarbaki en ekkert farbann er fyrir aðrar skepnur að og frá bænum. Komi fram kindur frá Hurðarbaki á öðrum bæjum skal láta eigendur vita tafarlaust, þeir munu sækja þær og skrá þær. Aðkomukindur á Hurðarbaki verða kyrrsettar, þeim fargað og þær bættar sem línubrjótar.
Nokkrar kindur frá Hurðarbaki ásamt lömbum þeirra voru fluttar inn á Flóamannaafrétt áður en grunur um riðu vaknaði. Þessum kindum verður smalað með öðru fé í haust og þær dregnar í sérstakan dilk.
Vegna smitvarna leggur héraðsdýralæknirinn áherslu á vegna smitvarna að skv. 4. gr. reglugerðar nr. 651/2001 um útrýmingu á riðuveiki og bætur vegna niðurskurðar, er óheimilt að flytja sauðfé til lífs milli bæja á sýktum svæðum, svo sem Flóanum. Einnig er bent á að ekki skal hýsa aðkomufé né fóðra eða brynna því með heimafé.
Mikilvægt er að finna sýktar kindur sem fyrst, til að koma í veg fyrir að riðuveiki breiðist út. Þess vegna eru bændur í Flóahreppi eindregið hvattir til þess að tilkynna héraðsdýralækni um sjálfdauðar fullorðnar kindur, einnig um kindur sem þarf að lóga vegna veikinda eða vanþrifa, svo að héraðsdýralæknirinn geti metið hvort það þurfi að taka heilasýni.
Frekari upplýsingar er að fá hjá Matvælastofnun, sími 530 4800.“