Fundargerð 86. fundar sveitarstjórnar Flóahrepps
Fundarstaður: Þingborg
Fundardagur: Miðvikudagur 7. júlí 2010
Fundartími: 20:00 – 24:00
Fundarmenn: Aðalsteinn Sveinsson, oddviti
Árni Eiríksson
Elín Höskuldsdóttir
Hilda Pálmadóttir
Svanhvít Hermannsdóttir
Margrét Sigurðardóttir, sveitarstjóri
Aðalsteinn Sveinsson setti fund og Margrét Sigurðardóttir ritaði fundargerð.
Samþykkt að fundargerð verði rituð á tölvu sbr. 23. gr. sveitarstjórnarlaga.
Margrét óskaði kjörnum sveitarstjórnarmönnum til hamingju og óskaði eftir góðu samstarfi við sveitarstjórn.
Dagskrá:
- Fundargerð skipulags- og byggingarnefndar uppsveita Árnessýslu og Flóa
Lögð fram fundargerð skipulags- og byggingarnefndar uppsveita Árnessýslu og Flóa dags. 18. maí 2010 ásamt afgreiðslufundum byggingarfulltrúa dags. 27. maí, 9. júní og 23. júní 2010.
Sveitarstjórn fjallar um liði nr. 6, nr. 7, nr. 20, nr. 43, nr. 44 og nr. 45 í fundargerð skipulags- og byggingarnefndar og samþykkir þá nema lið nr. 20, bygging fjarskiptamasturs í landi Hamars.
Sveitarstjórn gerir fyrirvara um að samþykki landeiganda liggi fyrir áður en framkvæmdir hefjast.
Svanhvít vill taka fram að hún skilur áhyggjur þeirra sem búa í nágrenni við fyrirhugað mastur.
Elín Höskuldsdóttir greiðir atkvæði á móti lið nr. 20 nema að fyrir liggi skriflegt samþykki milli landeigenda og framkvæmdaaðila.
- Beiðni um breytingu á landnotkun
Lögð fram beiðni frá Rósu Matthíasdóttur dags. 7. júní 2010 þar sem hún óskar eftir samþykki sveitarstjórnar fyrir breytingu á landnotkun þannig að frístundaland verði að landbúnaðarlandi.
Sveitarstjórn samþykkir að fresta afgreiðslu málsins og móta sér stefnu í málum varðandi það að breyta frístundabyggð í landbúnaðarland.
- Aðalskipulag Flóahrepps 2006-2018 í fyrrum Villingaholtshreppi
Lögð fram tillaga að Aðalskipulagi Flóahrepps 2006-2018 í fyrrum Villingaholtshreppi ásamt greinargerð dags. 1. mars 2010 og skýringaruppdráttum af byggð, samgöngum, landbúnaði og verndarsvæði.
Tillagan var til kynningar 1. – 2. mars 2010 sbr. 1. mgr. 17. gr. skipulags- og byggingarlaga og auglýst frá 8. apríl til 21. maí 2010. Frestur til að skila athugasemdum var til 21. maí 2010.
Fyrir liggja nýjar umsagnir frá öllum hlutaðeigandi aðilum nema Umhverfisstofnun.
Alls bárust 86 athugasemdir við tillöguna sem sveitarstjórn hefur kynnt sér og fyrir fundi liggur tillaga að umsögn sveitarstjórnar um framkomnar athugasemdir.
Svanhvít tók til máls varðandi fyrirliggjandi athugasemdir við auglýsta tillögu að aðalskipulagi.
Hún telur að svör séu rýr við umfangsmiklum athugasemdum og leggur til að afgreiðslu tillögu verði frestað til að bæta úr svörum við athugasemdunum.
Sveitarstjóra falið að ganga frá leiðréttingum á athugasemdum í samræmi við athugasemdir á fundinum.
Sveitarstjórn samþykkir fyrirliggjandi tillögu að aðalskipulagi ásamt greinargerð og skýringaruppdráttum sem og umsagnir sveitarstjórnar um athugasemdir sbr. 18. gr. skipulags- og byggingarlaga nr. 73/1997 með síðari breytingum.
Á fundi sveitarstjórnar Flóahrepps 3. mars 2010 var samþykkt að höfða mál fyrir héraðsdómi til ógildingar á ákvörðun umhverfisráðherra frá 29. janúar 2010 þar sem ráðherra synjaði staðfestingar þeim hluta aðalskipulags Flóahrepps er varðar Urriðafossvirkjun.
Héraðsdómari vísaði málinu frá með vísan til þess að nýtt skipulagsferli væri hafið og hefur sá úrskurður nú verið kærður til Hæstaréttar.
Fyrir fundi liggur fyrirspurn frá Svanhvíti Hermannsdóttur um hvort að sveitarstjórn hafi ekki þurft að taka ákvörðun um að kæra úrskurðinn til Hæstaréttar.
Þar sem héraðsdómur hefur ekki enn látið sig málið varða með efnislegum hætti var nauðsynlegt að krefjast úrskurðar Hæstarétts um að héraðsdómi væri skylt að leggja efnisdóm á málið eins og ákvörðun sveitarstjórnar fjallaði um.
- Stjórnsýslukæra vegna samning um öflun og sölu vatns
Lagt fram erindi frá Samgöngu- og sveitarstjórnarráðuneyti dags. 26. maí 2010 þar sem óskað er umsagnar sveitarstjórnar við stjórnsýslukæru frá Ólafi Sigurjónssyni dags. 26. apríl 2010. Ólafur kærir til samgönguráðuneytis, samning um öflun og sölu vatns milli Flóahrepps, Árborgar og Landsvirkjunar.
Einnig eru lögð fram drög að umsögn Flóahrepps dags. 29. júní 2010 við stjórnsýslukærunni unnar JP lögmönnum.
Sveitarstjórn samþykkir að senda fyrirliggjandi umsögn vegna stjórnsýslukæru til ráðuneytisins.
Svanhvít Hermannsdóttir situr hjá við afgreiðslu málsins.
- Breyting á samþykktum um stjórn og fundarsköp Flóahrepps
Tekin til seinni umræðu, breytingartillaga á samþykktum um stjórn og fundarsköp Flóahrepps. Breytingin felst í því að atvinnu- og ferðamálanefnd, umhverfisnefnd og samgöngunefnd verði sameinaðar í eina fimm manna nefnd, atvinnu- og umhverfisnefnd.
Einnig breytist 58. gr. þannig:
Um ráðningu, kaup og kjör lausráðinna starfsmanna verði farið eftir kjarasamningum viðkomandi stéttarfélaga.
Sveitarstjórn samþykkir ofangreinda breytingartillögu um stjórn og fundarsköp í Flóahreppi.
- Erindi frá Svanhvíti Hermannsdóttur
Tekin fyrir erindi frá Svanhvíti Hermannsdóttur dags. 2. júlí 2010 þar sem hún leggur til að fundargerðir Flóahrepps verði ítarlegri en verið hefur. Í 32. gr. samþykktar um stjórn og fundarsköp í Flóahreppi kemur fram að ,,skrá skal þau mál sem tekin eru fyrir, dagsetningu þeirra, aðila máls og meginefni og hvernig mál er afgreitt“.
Svanhvít fer fram á að fundargerðir verði þannig skráðar að getið sé aðila máls og meginefnis eins og kveðið er á um í fundarsköpum Flóahrepps.
Einnig leggur hún til að sveitarstjórnarmenn flytji mál sitt úr ræðustóli á sveitarstjórnarfundum og eins og samþykkt og stjórn um fundarsköp kveða á um.
Sveitarstjórn samþykkir að halda óbreyttu fyrirkomulagi varðandi fundargerðir, sveitarstjórnarmenn tjá sig um hverja bókun fyrir sig þegar hún er lesin til samþykkis.
Einnig samþykkir sveitarstjórn að fundarmenn geti talað úr púlti ef þeir kjósa.
- Framkvæmdir við Flóaskóla
Lagðar fram fundargerðir vinnuhóps um framkvæmdir við Flóaskóla dags. 28. júní og 5. júlí 2010.
Einnig lagður fram til kynningar, listi yfir greiddan kostnað vegna framkvæmda við Flóaskóla ásamt áætlun um áður ósamþykktan kostnað svohljóðandi:
Aukakostnaður, rafmagn, 25.135 kr., stigahandrið, 1.754.384 kr., rafmagnstæki vegna kennslu, 1.000.000 kr., frágangur við útidyr, 453.000 kr., einangrun utan á sökkul, 715.000 kr., frágangur á vegg milli nýja og gamla skóla, 864.119 kr., parket á smíðastofu, 642.070 kr., frágangur lagna utanhúss, 355.000 kr., jarðvegsframkvæmdir, lokafrágangur, 7.100.000 kr., breyting á gamla skóla, 400.000 kr., og jarðvegsframkvæmdir, fyrri hluti, við skólann, 1.500.000 kr. samtals 14.808.708 kr..
Áætlun um annan ósamþykktan kostnað vegna viðbyggingar er eftirfarandi:
skjávarpar, 300.000 kr., tússtöflur, 160.000 kr., tölvur og tengingar, 2.500.000 kr., húsgögn kennaraaðstaða, 700.000 kr., samtals 3.660.000 kr.
Sveitarstjórn samþykkir ofangreindar kostnaðartölur.
Vegna raka í gólfum verður sett bráðabirgðaefni á gólf. Reiknað er með að búið verði að leggja varanleg efni á gólf um næstu áramót.
- Erindi frá Jöfnunarsjóði
Lagt fram til kynningar, erindi frá Jöfnunarsjóði sveitarfélaga dags. 25. júní 2010 þar sem fram kemur að ráðgjafanefnd sjóðsins samþykki að leggja til við samgönguráðuneytið að taka þátt í kostnaði við 2. áfanga framkvæmda við Flóaskóla.
Sveitarstjórn fagnar erindi Jöfnunarsjóðs.
- Framkvæmdir vegna neysluvatnslagnar frá Selfossi að Ruddakrók
Lagðar fram fundargerðir samráðsnefndar um vatnsveituframkvæmdir í Flóahreppi og Árborg dags. 16. júní, 23. júní og 30. júní 2010.
Jafnframt lögð fram tillaga að staðsetningu tveggja dæluhúsa við þjóðveg 1, annars vegar í landi Uppsala (allt að 5 fm) og hinsvegar í landi Lambastaða 2 (allt að 15 fm). Uppsetning dæluhúsanna er í tengslum við framkvæmdir á neysluvatnslögn frá Selfossi að Ruddakrók.
Sveitarstjórn samþykkir tillöguna skv. 3. tl. bráðabirgðaákvæðis skipulags- og byggingarlaga að fengnum meðmælum Skipulagsstofnunar.
Einnig lögð fram tillaga að legu neysluvatnslagnar um land Neistastaða, Hurðarbaks og Dalsmynnis í fyrrum Villingaholtshreppi auk staðsetningar á allt að 15 fm dæluhúsi í landi Neistastaða. Ekki er í gildi aðalskipulag á þessu svæði en skv. fyrirliggjandi tillögu er umrætt svæði skilgreint sem landbúnaðarsvæði auk vatnsverndarsvæðis að hluta til. Sveitarstjórn samþykkir tillöguna skv. 3. tl. bráðabirgðaákvæðis skipulags- og byggingarlaga að fengnum meðmælum Skipulagsstofnunar.
Sveitarstjórn Flóahrepps samþykkir einnig framkvæmdaleyfi fyrir lagningu neysluvatnslagnar frá Selfossi að landi Neistastaða austan við Þingborg.
Í framkvæmdinn felst að gert er ráð fyrir nýrri vatnslögn á um 5,5 km kafla auk þess sem núverandi vatnslögn verður endurnýjuð að hluta, þannig að í heild verður lögnin 13,8 km að lengd með sverleika á bilinu 180-250 mm. Auk vatnslagnar er gert ráð fyrir þremur 5-15 fm dæluhúsum í landi Uppsala, Lambastaða 2 og Neistastaða.
Framkvæmdaleyfið byggir á lýsingu eins og hún er sett fram í skýrslu Verkfræðistofu Suðurlands dags. maí 2010 um tilkynningu framkvæmdarinnar til ákvörðunar um matsskyldu.
Fyrir liggur niðurstaða Skipulagsstofnunar dags. 24. júní 2010 varðandi ákvörðun um matsskyldu framkvæmdarinnar í heild. Þar kemur fram að það sé mat Skipulagsstofnunar að framkvæmdin sé ekki líklegt til að hafa í för með sér umtalsverð umhverfisáhrif og að hún skuli því ekki háð mati á umhverfisáhrifum framkvæmda.
Framkvæmdaleyfið er gefið út með þeim fyrirvara að ekki er heimilt að hefja framkvæmdir við dæluhús og neysluvatnslögn í fyrrum Vilingaholtshreppi fyrr en fyrir liggja meðmæli Skipulagsstofnunar skv. 3. tl. bráðabirgðaákvæði skipulags- og byggingarlaga með þeim framkvæmdum.
Framkvæmdaleyfi þetta fellur úr gildi ef framkvæmdir hafa ekki hafist innan tveggja ára frá dagsetningu þess.
- Beiðni um námsvist utan lögheimilissveitarfélags
Lögð fram beiðni dags. 28.maí 2010 frá Fjölskyldumiðstöð Árborgar um námsvist fyrir tvo nemendur í Flóaskóla með lögheimili í Árborg.
Sveitarstjórn samþykkir beiðnina sbr. 5. gr. laga nr. 91/2008 með fyrirvara um að greitt verði með nemendum samkvæmt viðmiðunargjaldskrá Sambands íslenskra sveitarfélaga og að skólaakstur og allur annar kostnaður sem fellur til vegna skólavistunar nemendanna verði greiddur af lögheimilissveitarfélagi.
Samþykkt að vísa málinu til kynningar hjá fræðslunefnd og skólastjóra.
- Erindi vegna skólaaksturs 2010-2011
Lagt fram erindi frá íbúum í sveitarfélaginu dags. 20. júní 2010 þar sem óskað er eftir upplýsingum varðandi bókun sveitarstjórnar Flóahrepps 26. maí 2010 um skólaakstur.
Aðalsteinn sagði eðlilegt að nemandi fengi að nota skólabíl þegar hann er á ferð.
Svanhvít telur eðlilegt að nemendur fái að nota skólabíl á Selfoss á meðan að kennsla fer fram þar fyrir unglinga úr Flóahreppi.
Sveitarstjórn samþykkir að nemandi fái að nota skólabíl á Selfoss skólaárið 2010-2011 eins og hingað til.
Sveitarstjóra falið að svara erindinu.
- Beiðni um framlag unglingavinnu
Lagt fram erindi frá Hannesi Lárussyni, Austur-Meðalholti, þar sem hann óskar eftir framlagi unglingavinnu sveitarfélagsins í tengslum við slátt á svæðinu við Íslenska bæinn.
Sveitarstjórn sér sér ekki fært að verða við erindinu þar sem mikil vinna er fyrirliggjandi hjá unglingum í tengslum við framkvæmdir vegna Flóaskóla en samþykkir að aðstoða hann við umbeðið verkefni með öðrum hætti.
- Fundargerðir
a) Sveitarstjórnar Flóahrepps
Fundargerðir sveitarstjórnar dags. 26. maí og 14. júní 2010 lagðar fram.
b) Félagsmálanefndar í uppsveitum Árnessýslu og Flóa
Fundargerðir félagsmálanefndar dags. 25. maí og 8. júní lagðar fram.
- Til kynningar:
a) 434. fundur SASS dags. 25. júní 2010
b) 127. fundur Heilbrigðisnefndar Suðurlands dags. 2. júní 2010
c) 190. fundur Sorpstöðvar Suðurlands dags. 20. maí 2010
d) 84. fundur fulltrúaráðs Brunavarna Árnessýslu dags. 21. maí 2010
- Önnur mál:
Sveitarstjórn samþykkir að skrifstofa sveitarfélagsins verði lokuð á föstudögum frá 16. júlí til og með 27. ágúst 2010.
Fleira ekki tekið fyrir og fundi slitið kl. 24:00
Aðalsteinn Sveinsson, oddviti (sign)
Árni Eiríksson, varaoddviti (sign)
Elín Höskuldsdóttir, (sign)
Hilda Pálmadóttir, (sign)
Svanhvít Hermannsdóttir, (sign)
Margrét Sigurðardóttir, (sign)