Á fundi sveitarstjórnar Flóahrepps 13. janúar s.l. var jafnréttisáætlun samþykkt fyrir Flóahrepp. Hana má sjá hér:
Jafnréttisáætlun Flóahrepps
1. Inngangur
Jafnréttisáætlun Flóahrepps byggir á lögum um jafna stöðu og jafnan rétt kvenna og karla nr. 10/2008. Jafnréttisáætlunin tekur til stjórnkerfis og starfsmanna sveitarfélagsins annars vegar og hins vegar til starfsemi og þjónustu sem stofnanir sveitarfélagsins veita íbúum. Auk þess eru í áætluninni tilmæli til einstaklinga og yfirvalda, stofnana og fyrirtækja sem ekki heyra undir stjórn sveitarfélagsins.
Sveitarstjórn Flóahrepps sinnir hlutverki jafnréttisnefndar í sveitarfélaginu.
2. Markmið
Markmið jafnréttisáætlunar er að stuðla að jafnri stöðu kvenna og karla í Flóahreppi og jöfnum möguleika kynjanna til að nýta sér það lagalega jafnrétti sem er til staðar. Þetta á við um menntun, atvinnulíf og félagslíf. Það er stefna Flóahrepps að kynin njóti sömu tækifæra, fái sömu laun fyrir sömu vinnu og hafi sömu réttindi og sömu möguleika til áhrifa í samfélaginu.
3. Ákvæði vegna starfsmanna sveitarfélagsins
· Nefndir og ráð: Við skipan í nefndir og stjórnir á vegum sveitarfélagsins skal leitast við að hlutföll kynja séu sem jöfnust til að tryggja áhrif kvenna og karla við ákvarðanatöku og stefnumótun í samfélaginu.
· Auglýsingar og ráðningar starfsmanna: Jafnréttisnefnd beinir þeim tilmælum til stjórnenda sveitarfélagsins að auglýsa lausar stöður til umsóknar. Auglýsing skal vera aðgengileg öllum.
· Starfsmannakjör: Við ákvörðun launa og annarra starfskjara, úthlutun verkefna, tilfærslur í störfum og uppsagnir skal þess gætt að mismuna ekki eftir kynferði sbr. 24. gr. laga nr. 10/2008. Því skal leitast við að meta jafnt mismunandi starfssvið, reynslu og menntun karla og kvenna.
· Gæta skal þess að konur og karlar njóti að öllu leyti sambærilegra kjara og starfsaðstæðna með vísan í lög um jafna stöðu og rétt kvenna og karla nr. 10/2008.
· Jafnréttisáætlanir: Því er beint til yfirvalda grunn- og leikskóla að vinna að því að jafna stöðu kynjanna og veita börnum og unglingum hvatningu til að nýta hæfileika sína til fulls, bera virðingu hvert fyrir öðru og efla jákvæð samskipti kynjanna.
· Kannanir og rannsóknir: Félagsmálanefnd skal leitast við að halda uppi rannsóknum á stöðu kynjanna í sveitarfélaginu. Í þessu skyni skal aflað tölfræðilegra upplýsinga um stöðu karla og kvenna í sveitarfélaginu.
4. Jafnréttisáætlanir stofnana
Í upphafi hvers kjörtímabils skulu stofnanir og nefndir sveitarfélagsins gera starfsáætlun í jafnréttismálum. Þar komi fram hvernig stofnanir/nefndir hyggist vinna á grundvelli jafnréttisáætlunarinnar og hvaða aðgerðir eru fyrirhugaðar í þeim tilgangi.
5. Íþrótta- og æskulýðsmál
Tryggja skal eftir föngum að stúlkum og drengjum séu veitt sömu tækifæri til íþróttaiðkana og að kynin sitji jöfn að fjárveitingum á vegum sveitarfélagsins til íþróttaiðkunar.
Þess skal gætt að stúlkur og drengir hafi sömu möguleika til sumarstarfa á vegum sveitarfélagsins.
6. Fræðsla og ráðgjöf
Fræðsla um jafnréttismál og leiðir til að vinna að jafnri stöðu kynjanna skal vera virkur þáttur í starfi sveitarfélagsins. Fylgjast skal með endurmenntun í sveitarfélaginu og skulu stjórnendur beita sér fyrir því að slíkir möguleikar sú fyrir hendi sem geti aukið tækifæri kvenna og karla til atvinnu og menntunar.
7. Kynning og endurskoðun.
Jafnréttisáætlun þessi skal kynnt íbúum sveitarfélagsins, stofnunum og starfsmönnum þeirra.
Áætlunina skal endurskoða eftir þörfum, ekki seinna en fjórum árum frá samþykkt hennar.
Samþykkt af sveitarstjórn Flóahrepps þann 13. janúar 2010
Margrét Sigurðardóttir, sveitarstjóri