Sá fáheyrði og leiði atburður varð í upphafi skólaárs á skólalóð Flóaskóla að nemandi skólans var bitinn af hundi sem komið hafði inn á lóðina. Umræddur nemandi fékk ljóta áverka á upphandlegg og báða fótleggi en fékk aðhlynningu á slysadeild HSu og er á batavegi.
Ljóst er að ef ekki hefði verið fyrir snör viðbrögð starfsfólks og annarra nemenda að mun verr hefði getað farið. Nemendur og starfsfólk Flóaskóla voru mjög slegin yfir þessu atviki og alvarleika þess. Í kjölfarið hafa komið upp umræður um hundahald og ábyrgð hundeigenda í því samhengi. Tryggja þarf að nemendur Flóaskóla séu öruggir á lóð skólans fyrir utanaðkomandi hættum sem þessum. Í Flóahreppi hafa ekki verið settar neinar sérstakar samþykktir um hundahald enda um dreifbýlissveitarfélag að ræða. Þess eru þó dæmi að dreifbýlissveitarfélög setji sér reglur um hundahald og þá er gert ráð fyrir því að einstaklingar fái undanþágu til hundahalds gegn ákveðnum skilyrðum, s.s. að hundur fari ekki inn í skólahús og aðra opinbera staði, að hundar séu ábyrgðartryggðir og að þeir raski ekki ró íbúa sveitarfélagsins. Ekki hefur verið tekin ákvörðun um slíkt í Flóahreppi en það eru eindregin tilmæli til hundaeigenda í sveitarfélaginu að halda hundum heima og að sjá til þess að þeir séu ekki eftirlitslausir á ferð um sveitarfélagið. Sem betur fer fór betur en á horfðist með barnið sem bitið var á skólalóðinni en slíkur atburður má ekki endurtaka sig. Það verður ekki gert öðruvísi en með góðum vilja og aðstoð allra hundaeiganda í sveitarfélaginu.