Vatnsveita Flóahrepps

Heilbrigðiseftirlit Suðurlands tekur reglulega sýni úr vatnslindum sveitarfélagsins. Gæði vatns úr Ruddakróks/Urriðafosslind eru ekki nægilega góð og eru íbúar hvattir til að sjóða neysluvatn sitt í öryggisskyni meðan unnið er að úrbótum við endurheimt vatnsgæða þar.

Notendur vatns úr Ruddakróks/Urriðafosslindinni eru á Vatnsenda, Vatnsholti, í Kolsholtshverfinu, í Villingaholti og Þjórsárveri, allir bæjir við Hamarsveg og Vorsabæjirnir, Hellnabæjir að Tungu og Hólum að Baugsstöðum og einnig að Lækjarbakka. Ennfremur hús við Villingaholtsveg hjá Mjósyndi að Ragnheiðarstöðum.

Búið er tengja Vatnsveitu Flóahrepps við Vatnsveitu Árborgar, bæði við Selfoss og Stokkseyri.

Vatnssýni hefur verið tekið úr Bitrulindinni og reiknað er með að tengja hana við lögn frá Þingdal sem liggur niður fyrrum Hraungerðishrepp til að tryggja nægilegt vatnsmagn í þeim hluta sveitarfélagsins.

Ruddakrókslindin þornaði upp á mjög skömmum tíma og er um að kenna þurrkum og stórum leka sem fannst milli Kolsholts og Vorsabæjarhóls.

Vatni úr Urriðafosslindinni var dælt í Ruddakrók en því miður hefur vatnið þaðan ekki verið í nógu góðu lagi.

Reiknað hafði verið með að framkvæmdir við vatnsöflum úr Rangárþingi ytra í samstarfi við Rangárþing og Ásahrepp væru langt komnar í sumar en sú vinna fór út um þúfur þar sem sveitarfélögin austan Þjórsár gátu ekki fjármagnað framkvæmdina að sinni.

Farið var í viðræður við fulltrúa Árborgar og gengur undirbúningsvinna vel. Reiknað er með að virkja nýja lind undir Ingólfsfjalli og leggja lögn með Flóavegi að miðlunartanki í Ruddakrók.

Samúelslind í Þingdal verður áfram nýtt, lagt verður rafmagn að henni og dæla gangsett til að þjóna m.a. sumarhúsabyggð í Skálmholtslandi, Merkurhrauni og Merkurlaut.

Neistastaðalindir, Ruddakrókslind og Urriðafosslind verða aflagðar.

Íbúar og vatnsnotendur eru beðnir velvirðingar á óþægindum sem þetta ástand skapar þeim og vonast er til að íbúar þurfi ekki að upplifa fleiri sumur með litlu og slæmu neysluvatni.

Íbúar sem eru á Ruddakróks/Urriðafossvatnslögn geta fengið afhent vatn í flöskum á skrifstofunni á opnunartíma en vatnsverksmiðjan Icelandic Water Holdings ehf í Ölfusi hefur afhent sveitarfélaginu vatn án endurgjalds til íbúa Flóahrepps.