Skipulagsmál í Flóahreppi

Á síðasta fundi sveitarstjórnar Flóahrepps sem haldinn var 1. júlí s.l. var lagt fram erindi frá Skipulagsstofnun dags. 19. júní 2009 vegna deiliskipulags í Hróarsholti. Í erindi kemur fram að ekki verði veitt meðmæli samkvæmt 3. tl. ákvæðis til bráðabirgða í lögum nr. 73/1997 um stakar framkvæmdir eða auglýsingar á deiliskipulagstillögum á svæðum þar sem ekki liggur fyrir staðfest aðalskipulag og að það ákvæði hafi fallið úr gildi 1. nóvember 2008.

Sveitarstjórn átelur harðlega seinagang Umhverfisráðuneytis og Samgönguráðuneytis á afgreiðslu aðalskipulags Flóahrepps í fyrrum Villingaholtshreppi og þau mál sem að því lúta.
Þessi töf á afgreiðslu mála stöðvar alla deiliskipulagsvinnu og hamlar framkvæmdum og uppbyggingu í þessum hluta sveitarfélagsins.
Leitað var eftir meðmælum Skipulagsstofnunar um auglýsingu á deiliskipulagi sbr. 3. tl bráðabirgðaákvæðis þar sem aðalskipulag Flóahrepps í fyrrum Villingaholtshreppi hefur enn ekki fengið staðfestingu Umhverfisráðuneytis.
Tillaga að aðalskipulagi var send til ráðuneytisins 4. mars 2009 frá Skipulagsstofnun. Bréfum Flóahrepps til ráðuneytis hefur ekki verið svarað en samkvæmt munnlegum upplýsingum mun ráðuneytið bíða eftir endurúrskurði Samgönguráðuneytis um stjórnsýslukæru vegna virkjanamála.
Í Samgönguráðuneyti fást upplýsingar um að úrskurðað verði að nýju í kærumálinu í lok sumars eða í haust.
Skipulagsmál í fyrrum Villingaholtshreppi eru því á frosti þar til ráðuneytin hafa afgreitt málið á þeim hraða sem þeim hentar.