Frá UMF Vöku
Ungmennafélagið Vaka ætlar eins og áður að standa fyrir kvöldvöku á Fjöri í Flóa, nánar tiltekið föstudagskvöldið 5. júní kl 20:30 á útisvæðinu við Þjórsárver. Þar verður kveikt upp í grillum og hvetjum við fólk til að taka með sér eitthvað gott á grillið til að snæða. Þegar allir eru orðnir saddir er komið að hinni æsispennandi reiptogskeppni.
Ungmennafélagið Vaka ætlar eins og áður að standa fyrir kvöldvöku á Fjöri í Flóa, nánar tiltekið föstudagskvöldið 5. júní kl 20:30 á útisvæðinu við Þjórsárver. Þar verður kveikt upp í grillum og hvetjum við fólk til að taka með sér eitthvað gott á grillið til að snæða. Þegar allir eru orðnir saddir er komið að hinni æsispennandi reiptogskeppni.
Á síðasta ári kepptu þeir Stefán Geirsson og Trausti Hjálmarsson og lið þeirra sín á milli. Eftir mikil átök og spennandi keppni var það lið Trausta sem hafði betur. Í ár eru höfðingjar reiptogsliðanna heldur ekki af verri endanum en það eru kjarnakonurnar Elín Bjarnveig Sveinsdóttir í Egilsstaðakoti og Ingibjörg Einarsdóttir á Langsstöðum. Eru þær stöllur kunnar fyrir allt annað en linkind, og má búast við að reiptogssveitir þeirra muni heyja harða keppni sín á milli.
Í afrekaskrá Umf. Vöku kemur fram að Ingibjörg hefur náð betri árangri í flestum kastgreinum í gegnum tíðina, og m.a. kastað kúlu um hálfum metra lengra en Elín. Það er þó ekki víst að sá árangur muni fleyta liði Ingibjargar til sigurs, því Elín Bjarnveig er ekki vön að gefa neitt eftir þegar reiptog er annars vegar. Fregnir herma að þær stöllur séu nú þegar komnar vel á veg að skipa í sitt lið og er óhætt að segja að spennandi keppni er framundan.
Reiptog er þó ekki eina aflraunin sem keppt verður í þetta kvöld, en einnig fá vaskir menn og konur tækifæri til að keppa í steðjalyftu. Á svæðinu verður forláta steðji, ættaður frá Villingaholti og verður gestum boðið að reyna að lyfta steðjanum á nefinu með því að nota einungis aðra höndina. Í gegnum tíðina hafa margir reynt við steðjann og ekki allir haft erindi sem erfiði. Samkvæmt heimildum Umf Vöku hefur einungis tveimur hraustmennum tekist að yfirbuga steðjann og eru það þeir Einar Helgi frá Urriðafossi og Bói frá Önundarholti. Það verður því gaman að sjá hvort að einhverjir nái að hagga steðjanum.
Það er því óhætt að segja að þetta verður skemmtileg kvöldstund fyrir alla fjölskylduna. Heitt í kolunum, gott leiksvæði fyrir börnin og síðast en ekki síst, aflraunir upp á gamla máttann þar sem mun koma í ljós hver hreystimenni Flóahrepps eru. Vonumst til að sjá ykkur sem flest.
Umf Vaka