Eins og áður hefur komið fram þá heldum við okkar árlegu Vorhátíð þann 27. maí. Hátíðin tókst í alla staði mjög vel og vorum við starfsfólk Krakkaborgar afskaplega stolt af börnunum okkar sem fluttu skemmtiatriðin af miklu öryggi og sjálfstrausti.
Að þessu sinni voru það átta börn sem útskrifuðust frá Krakkaborg. Það voru blendnar tilfinningar sem bærðust um í brjóstum fólks enda um merk tímamót að ræða. Það er gaman að geta þess að þau Ragnar Sigurjónsson og S. Oddný Stefánsdóttir í Brandshúsum, foreldrar Ásthildar útskriftarstúlku, voru sérlega rausnarleg og gáfu öllum útskriftarbörnum leikskólans boli að gjöf í tilefni dagsins. Á bolunum var áletrað að framanverðu „Ég fer í Flóaskóla“ og að aftanverðu „Krakkaborg 2009“. Þar sem að sögn Oddnýjar, móður Ásthildar, er verið að kveðja gott, skemmtilegt og mikilsvert skólastig um leið og nýju er heilsað. Við þökkum þeim kærleg fyrir gjöfina og þá fallegu hugsun sem að baki hennar býr. Þeirra framlag og hugur er dæmi um fyrirmyndar samskipti og mér er sérlega ljúft að geta deilt þessu með ykkur. Því ekkert er mikilvægara í leikskólastarfinu en gott og traust samstarf á milli leikskólans og þeirra fjölskyldna er að honum koma. Starfsfólk Krakkaborgar þakkar börnunum og fjölskyldum þeirra kærlega fyrir samveruna um leið og við óskum þeim velfarnaðar í framtíðinni. Við erum sannfærð um að þau eigi eftir að standa sig með stakri prýði í Flóaskóla. Að lokum þökkum við einnig foreldrafélagi Krakkaborgar kærlega fyrir kaffiveitingarnar á Vorhátíðinni sem og glimrandi gott samstarf á liðnum vetri.
Sumarkveðja,
F.h. Starfsfólks Krakkaborgar
Karen Viðarsdóttir
Leikskólastjóri