Umhverfisverðlaun 2007

Umhverfisverðlaun Flóahrepps fyrir árið 2007 voru afhent föstudaginn 7. september.

Veitt voru verðlaun fyrir lögbýli og opinbera stofnun sem þóttu skara fram úr varðandi snyrtimennsku og góða umhirðu.

Bærinn Stóru Reykir fékk verðlaun sem snyrtilegasta lögbýlið og félagsheimilið Þjórsárver fékk verðlaun sem snyrtilegasta opinbera stofnunin.

Það var umhverfisnefnd Flóahrepps sem hafði veg og vanda að valinu samkvæmt fyrirframgefnum forsendum sem voru eftirfarandi fyrir lögbýli:

“Tún í góðri rækt, girðingar uppistandandi og vel hirtar, öll hús gömul sem ný í góðu ásigkomulagi. Vel og snyrtilega gengið frá öllum vélum svo og hey vel frágengið.”

Stóru Reykir stóðust allar ofangreindar forsendur ásamt því að garðrækt við íbúðarhúsin er mjög til fyrirmyndar og gerir ásýnd bæjarins glæsilega og snyrtilega heim að líta.

Þjórsárver hefur á síðustu árum verið sýnd mikil alúð við fegrun og bætur umhverfis.

Umhverfi Þjórsárvers er fallegt og vel um það hugsað, sama hvar litið er. Tré eru í góðri rækt sem og grasflatir og bílastæði mjög vel hirt og til fyrirmyndar.

Staðarhaldari Þjórsárvers, Valdimar Össuarson og húsnefnd Þjórsárvers, ábúendur Stóru Reykja, þau Gísli Hauksson og Jónína Einarsdóttir ásamt Sigurbjörgu Geirsdóttur eru því vel að verðlaununum komin og fá bestu hamingjuóskir með þau.

Í verðlaun voru skrautletrað skjal, undirritað af umhverfisnefnd ásamt 50.000 kr. ávísun. Einnig verður sett upp skilti á hvorn stað þar sem fram kemur að þeir hafi hlotið umhverfisverðlaun 2007.

Á myndinni hér að oafn eru: Margrét Sigurðardóttir, sveitarstjóri, Trausti Hjálmarsson formaður umhverfisnefndar, Aðalsteinn Sveinsson oddviti, Gísli Hauksson og Jónína Einarsdóttir bændur á Stóru Reykjum. Á myndina vantar Sigurbjörgu Geirsdóttur sem var að heiman þegar verðlaunin voru afhent.

Því miður er ekki hægt að setja nema eina mynd með hverri frétt en fleiri myndir má sjá á /ljosmyndir/gallery.asp?categoryid=29