haldinn 3. nóvember s.l. um húsnæði leikskólans.
Aðdragandi og boðun: Á fundi vinnuhóps um leikskólahúsnæði í Flóahreppi 3. okt. var lagt til að halda íbúafund til að ræða kosti og galla þess, fyrir bæði grunnskólann og leikskólann, að hafa báða skólana á sama stað í sveitarfélaginu. Vinnuhópurinn var sammála um að nauðsynlegt sé að skoða það sem möguleika betur og ræða í samfélaginu hér í sveit áður en ákvörðun er tekin um stækkun á húsnæði leikskólans. Tilefnið er m.a. að í nýlegum lögum um leik- og grunnskóla og endurskoðuðum aðalnámsskrám fyrir bæði skólastigin hefur verið gefið aukið svigrúm til meira samstarfs, samnýtingar og samreksturs á milli skólastiga leik- og grunnskóla og hafa sveitarfélög í auknum mæli nýtt sér það svigrúm. Íbúafundurinn var boðaður með dreyfimiða á alla bæi í sveitarfélaginu 24. október og aftur með áminningu 2. nóvember. Fundurinn var einnig boðaður á heimasíðu sveitarfélagsins. Í fundarboði komu fram 4 spurningar sem ætlunin var að ræða á fundinum.
Framkvæmd fundarins: Kristín Hreinsdóttir og Hrafnhildur Karlsdóttir frá Skólaskrifstofu Suðurlands fluttu erindi um málefnið og Sigrún Björk Benedikstdóttir leikskólastjóri á Laugarlandi sagði frá reynslunni þar eftir að leikskólinn var fluttur í sama húsnæði og grunnskólinn. Að loknum þessum framsögum var fundarmönnum skipt í fjóra umræðuhópa þar sem spurningarnar sem voru í fundarboði voru teknar fyrir. Hver og einn átti að leggja fram sínar ábendingar/athugasemdir eða svör við hverri spurningu og söfnuðu hópstjórarnir þeim saman. Að lokinni hópavinnu var kaffihlé. Að endingu var opið fyrir fyrirspurnir og almennar umræður.
Fundarstjóri var Valdimar Guðjónsson en hópstjórar voru Baldur I. Sveinsson, Elín Bjarnveig Sveinsdóttir, Haraldur Þórarinsson og Margrét Sigfúsdóttir.
Niðurstöður fundarins: Spurningarnar 4 sem fundarmenn voru beðnir um að velta fyrir sér og notaðar voru í hópavinnunni voru eftirfarandi:
1. Hvern telur þú helsta ávinninginn af því fyrir leikskólann Krakkaborg að vera í nálægð við skólastarfið í Flóaskóla?
2. Hvernig telur þú að það geti hamlað leikskólastarfinu að færa Krakkaborg að skólasvæðinu við Flóaskóla?
3. Hvern telur þú helsta ávinninginn af því fyrir Flóaskóla að vera í nálægð við skólastarfið í Krakkaborg?
4. Hvernig telur þú að það geti hamlað grunnskólastarfinu að færa Krakkaborg að skólasvæðinu við Flóaskóla?
Segja má að mikið til sömu atriði voru nefnd sem ávinningur fyrir bæði skólastigin. (sp. 1 og sp. 3). Það átti einnig við um það sem fólk taldi helst getað hamlað skólastarfi. (sp. 2 og sp. 4)
Varðandi ávinning þá nefndu margir betri nýtingu á húsnæði, aðstöðu og námsgögnum. Í því sambandi nefndu nokkrir mötuneytisaðstöðuna. Bent var á fjárhagslegann ávinning og sparnað. Gagnvart leikskólanum var nefnt að hægt væri að bjóða upp á hentugra húsnæði, betra starfsumhverfi, samnýting námsgagna, tækja og verkfæra. Einnig var nefnt stærra útisvæði og skemmtilegra umhverfi.
Nokkuð var um að bent væri á betri nýtingu á starfsfólki og möguleika á auknu samstarfi þeirra. Nefnt var að það skapaði öflugri starfsmannahóp og aukið faglegt starf í skólunum. Það var nefnt sem ávinningur samnýting sérkennara, þroskaþjálfa, íþróttakennara, og myndlistakennara. Einnig að fagþekking leikskólakennara/grunnskólakennara nýttist á báðum skólastigum. Bent var á möguleika á að hafa einn skólastjóra yfir báðum skólunum til að minka kostnað.
Ávinning fyrir nemendur skólanna bentu margir á betri samfellu í skólagöngu og betri möguleikum á samþættingu náms á milli skólastiga. Leikskólabörn ættu möguleika á að kynnast Flóaskóla betur áður en þau hæfu þar nám og kæmu betur undirbúin. Vináttu- og félagsleg tengsl nemenda milli árganga rofna ekki og hægt að hitta eldri systkyni. Aukin þátttaka í viðburðum var nefnd. Bráðger börn í leikskóla fái betri námstækifæri og námið gæti verið fjölbreyttara fyrir alla. Einnig gæti leikskólinn hentað yngstu nemendum grunnskóla sem þurfa lengri aðlögun. Nokkrir töldu það ávinning fyrir Flóaskóla að fá leikskólastarfið meira inn í kennslu yngstu barnana. Það var einnig talinn ávinningur að eldri grunnskólabörnin lærðu að umgangast þau yngri og einning að yngri börnin lærðu af þeim eldri.
Nokkrir fundarmanna bentu á möguleika á aukinni þjónustu. Möguleikar væru á samþættingu leikskóla við skólavistun/dagskóla s.s þá daga sem skólinn er í frí en leikskólinn starfar. Einnig meiri möguleikar á auknu íþróttastarfi eftir skóla. Leikskólabörn gætu fengið tónlistarkennslu í skólanum. Elstu börn leikskólans gætu átt möguleika á að fara með skólabílum og forleldrar þurfi bara að sækja börn á einn stað. Einnig var nefnt að betra væri að skipuleggja skólastarfið með tilliti til fríadaga og ýmissa viðburða þannig að sama gilti fyrir bæði skólastigin. Möguleikar á meiri þjónusu mötuneytis s.s. morgunmat og síðdegiskaffi fyrir grunnskólanemendur.
Varðandi hvað gæti hamlað skólastarfi í báðum skólunum bentu margir á að aðstaða yrði ekki nógu góð. Í því sambandi var nefnt að útisvæði við leikskólann í Þingborg væri mjög gott og ekki væri hægt að koma upp sambærilegu við Flóaskóla. Nefnt var að leiksvæðið yrði þrengra og afmarka þyrftir það fyrir aldurshópa. Landrými væri ekki nóg við Flóaskóla og erfitt væri að gera ráð fyrir aukinni bílaumferð á svæðinu. Einnig var bent á að íþróttaaðstaða við leikskólann verði mun verri. Nefnt var að rekstur húsnæðis væri dýrari í Flóaskóla en í Þingborg vegna þess að ekki er hitaveita og kostnaður við uppbyggingu gæti orðið dýrari.
Nefnt var að erfiðra gæti verið að fá starfsfólk vegna aukins aksturs í vinnu. Samnýting starfsfólks væri takmörkuð vegna þess að skóladagar í Flóaskóla eru færri en í leikskólanum. Stærri starfsmannahópur kallaði á fleiri millistjórnendur og/eða starfsmannastjórn gæti orðið erfiðari. Einnig var nefnt að rekstur mötuneytis gætu orðið dýrari.
Varðandi nemendur þá var nefnt að leikskólastarfið gæti orðið ómarkvissara vegna heildarhagsmuna á svæðinu. Leikskólastarfið gæti orðið of grunnskólamiðað. Gott starf í leikskólanum í dag myndi glatast, það gæti týnst í stærri einingu. Athygli á leikskólann yrði minni og hann gæti glatað sínu sjálfstæði. Sömuleiðis var bent á að athygli gæti orðið of mikil á yngri börn og leikskólastarfið. Grunnskólinn myndi falla í skuggann og/eða hann yrði gerður of smábarnalegur. Einnig var nefnt að skólabörn vildu ekki hafa leikskólabörn í kringum sig og hugsanlega hafi þau truflandi áhrif. Einnig að áreiti gæti verið frá eldri nemendum gagnvart þeim yngri. Nokkrir höfðu áhyggjur af því að það væri of langur tími fyrir börn að vera á samastað í skóla frá því innan við 1 árs til 16 ára. Hætta væri meiri á skólaleiða og skil milli skólastiga væru e.t.v. nauðsynleg.
Nefnt var og sumir töldu að fleiri foreldar þurfi að keyra lengra með leikskólabörnin m.a. vegna þess að hann væri meira úr leið. Það myndi hugsanlega fækka börnum í leikskólanum.
Annað sem fram kom hjá fundarmönnum í hópavinnu var að lausn á húsnæðismálum leikskólans gæti verið að ráða dagmæður. Einnig að hægt væri að auka samþættingu náms í grunnskóla og leikskóla með því að kenna 1 og 2. bekk frekar í Þingborg.
Umræður og fyrirspurnir: Í fundarlok komu nokkrir fundarmenn með fyrispurnir til frummælenda og fundarboðenda sem þeir svo svöruðu.
Þingborg 30. nóvember 2011
Vinnuhópur um húsnæði leikskólans i Flóahreppi.