Fræðslunefnd Flóahrepps boðar íbúa sveitarfélagsins á íbúafund í Flóaskóla fimmtudagskvöldið 17. febrúar kl. 20:30.

Fundurinn er boðaður til að fá hugmyndir og álit þeirra sem byggja upp samfélagið á því hvernig húsnæðismálum leikskólans er best hagað til framtíðar litið.

Íbúafjöldi Flóahrepps er nú um 600 manns. Á undanförnum árum hefur fjölgað í sveitarfélaginu og hefur leikskólinn Krakkaborg vaxið og dafnað í samræmi við þá fjölgun. Nú er svo komið að húsnæði leikskólans er orðið of lítið og þá þarf að skoða hvað hægt sé að gera í húsnæðismálum Krakkaborgar.

Ný lög leik- og grunnskóla tóku gildi 1. júlí 2008. Aukin ábyrgð var sett á hendur sveitarfélaga varðandi allan rekstur , eftirlit og framfylgd laganna.

Leikskólinn Krakkaborg hefur nú verið starfræktur í tæp 7 ár í núverandi húsnæði. Undanfarin tvö ár hafa verið gerðar miklar breytingar á húsnæði leikskólans og einnig hefur verið mikil uppbygging á starfsemi hans.

Fyrir fundinn biðjum við íbúa að velta fyrir sér eftirfarandi umræðupunktum:

· Í Krakkaborg hefur sú þjónusta verið í boði í tæp 7 ár að taka börn inn á yngstu deild frá 9 mánaða aldri. Hvert er álit þitt á þeirri þjónustu? Er hægt að leysa húsnæðisvandann með því að hækka lágmarksvistunaraldur í 2ja ára?

· Hvert er álit þitt á því að nýta annað húsnæði sem sveitarfélagið á til að koma til móts við húsnæðisvanda Krakkaborgar:

a) Að nýta t.d. ríflegt húsnæði við Flóaskóla fyrir elstu börn leikskólans og nýta þannig tækifæri til áframhaldandi samstarfs á milli skólastiga?

b) Að nýta húsnæði í félagsheimilinu Þingborg?

c) Að nýta húsnæði í félagsheimilinu Félagslundi?

· Hvert er álit þitt á að setja upp lausar kennslustofur við Krakkaborg eða byggja við núverandi húsnæði?

Með von um góða mætingu og metnaðarfulla og málefnalega umræðu.

Kaffi og meðlæti!

Fræðslunefnd Flóahrepps.