Það er stór ákvörðun fyrir lítð sveitarfélag að ráðast í framkvæmdir við byggingu 1.134 m2 skólahúsnæðis.
Íbúaþróun í Flóahreppi síðustu ár hefur verið þannig að skólahúsnæði var orðið of lítið og þrengsli nemenda og starfsmanna voru mikil með þeirri starfsemi sam hér var áður, þ.e. kennsla 1. til 7. bekkjar grunnskólans
Það sýndi bæði metnað og þor íbúa sveitarfélagsins að vilja stækka skólann meira og starfrækja skóla fyrir alla bekki grunnskólans. Til þess að meta möguleika Flóahrepps á að fara í þessar breytingar skipaði sveitarstjórn stýrihóp í byrjun sumars 2008 sem hafði það verkefni að gera þarfagreiningu og vinna tillögur að staðsetningu og fyrirkomulagi við uppbyggingu skólamála í sveitarfélaginu. Í stýrihópnum áttu sæti Jóhannes Símonarson sveitarstjórnarmaður, Guðmundur Jón Sigurðsson umsjónarmaður fasteigna, Kristín Sigurðardóttir skólastjóri, Elín Höskuldsdóttir formaður fræðslunefndar og Margrét Sigurðardóttir sveitarstjór.
Stýrihópurinn lét gera úttekt á þeim byggingum sem fyrir voru á svæðinu með tillit til þess hvernig þær gætu nýst sem best í framtíðinni. Sérstaklega var horft til þess hvort það borgaði sig að breyta eldri byggingum á einhvern hátt m.a.elsta skólahúsnæðinu og félagsheimilinu Þjórsárveri svo þær byggingar nýttust betur fyrir skólastarfið.
Niðurstaðan úr þessari vinnu var að hagkvæmast og best væri að nýta eldri byggingarnar nánast lítið breyttar en leggja áherslu á að byggja við það sem upp á vantar.Vegna aðstæðna á svæðinu og með framtíðarnýtingu þess í huga fyrir skóla- og íþróttastarfsemi var lagt til að reisa viðbyggingu á tveimur hæðum við skólann samtals um 1.100 m2.
Þessi undirbúningsvinna var grundvöllur að því hvað gengið hefur hratt og vel að koma bygginu upp og í notkun. Strax í upphafi vinnu stýrihóps var gengið út frá því að nýta allt fjármagn sem í uppbyggingu færi sem allra best fyrir þá starfsemi sem fram á að fara í skólanum.
Á grundvelli þessa undirbúnings var leitað eftir verðhugmyndum í hönnun viðbyggingar. Jón Friðrik Matthíasson hjá teiknistofunni M2 var ráðinn í verkið. Jón Friðrik var mjög áhugasamur fyrir þeim markmiðum sem sett voru um hagkvæma byggingu.
Strax og frumhönnun var tilbúin auglýsti Flóahreppur eftir samstarfsaðilum meðal byggingaverktaka. Hugmyndin með því var að leita eftir þeirra hugmyndum um hvernig hagkvæmast og best væri að byggja. Nokkur fjöldi verktaka lagði fram verðhugmyndir og tillögur að byggingaefni og á grundvelli þeirra var gengið til samninga við verktakafyrirtækið Smíðanda.
Ekki var farin hin hefðbundna útboðsleið. Markmiðið með því var fyrst og fremst að leiða alla aðila sem fyrst að borðinu og gera allt verkefnið að samstarfsverkefni allra þ.e. bæði hönnuðar, verktaka og verkkaupa. Verkinu var ekki stillt þannig upp að verktakinn ynni verkið á grundvelli útboðsgagna sem verkkaupinn kaupir hjá hönnuðum heldur var unnið á grundvelli byggingalýsingar.
Framkvæmdir hófust í byjun ágúst 2009 þegar Kristín skólastjóri tók fyrstu skóflustunguna. Síðan þá hafa verkáætlanir að mestu gengið eftir. Byggingin var tekin í notkun þegar skóli hófst í ágúst s.l. rétt rúmu ári eftir að framkvæmdir hófust.
Samstarf við alla sem að byggingunni hafa komið, bæði aðalverktaka, undirverkataka og annarra verktaka hefur gengið mjög vel og eru þeim færðar þakkir fyrir þeirra hlut í framkvæmdum.
Það var í reynd ekki fyrr en verðhugmyndir verktaka lágu fyrir s.l.sumar að endanleg ákvörðun sveitastjórnar um að fara í þessa framkvæmd var tekin. Þá fyrst var hægt að sjá hvernig fjárhagsdæmið gæti litið út og meta bolmagn Flóahrepps til að fara í jafn viðamikla framkvæmd.
Í áætlunum Flóahrepps var gert ráð fyrir að framkvæmir myndu kosta allt 240 millj. Það var töluvert lægri upphæð en í fyrstu voru nefndar sem tóku mið af meðalkostnaði í byggingu skólahúsnæðis.
Heildarkostnaður í dag við framkvæmdir er kominn í 200 milljónir kr.
Vegna sameiningar sveitarfélaga á síðasta kjörtímabili kemur Jöfnunarsjóður sveitarfélaga að þessari framkvæmd. Jöfnunarsjóðnum er ætlað að styrkja uppbyggingu á innviðum nýsameinaðra sveitarfélaga og hefur til þess sérstakt fjármagn. Hlutur Jöfnunarsjóðs í framkvæmdinni er um 70 milljónir kr. Sveitarfélagið greiðir annan kostnað sem er þá u.þ.b. 130 milljónir kr. Engin lán hafa verið tekin eða verða tekin vegna þessarra framkvæmda.
Það var gæfa fyrir þetta samfélag þegar sveitarfélögin þrjú sem nú heita Flóahreppur, ákváðu að sameina sína skóla og stofna Flóaskóla. Það var hreint ekki einföld ákvörðun á þeim tíma en að henni var vel staðið á allan hátt.
Það starfsfólk sem hér hefur starfað frá stofnun skólans undir stjórn Kristínar skólastjóra hefur unnið mjög gott starf og skapað traust í samfélaginu á skólanum.
Það er mikilvægt að skapa góðar vinnuaðstæður fyrir bæði nemendur, kennara sem og annað starfsfólk skólans en sveitarstjórn Flóahrepps hefur fyrst og fremst haft það að leiðarljósi við uppbyggingu skólans.
(Úr ræðu oddvita Flóahrepps, Aðalsteins Sveinssonar, við vígslu viðbyggingar Flóaskóla)