Umhverfisverðlaun Flóahrepps voru afhent í dag, fimmtudag 10. september. Í þetta skiptið var unnið samkvæmt nýjum vinnureglum Umhverfisnefndar en verðlaun voru veitt annarsvegar fyrir heimili og hins vegar fyrir fyrirtæki/stofnanir.
Í flokknum fyrirtæki/stofnanir fékk Tilraunabúið Stóra-Ármóti viðurkenningu og í flokknum heimili fengu hjónin Ester Jónsdóttir og Theódór Guðjónsson viðurkenningu.Í umsögn Umhverfisnefndar segir að við Tilraunabúið Stóra-Ármóti sé hirðusemi og nosturleg snyrtimennska aðalsmerki staðarins og mjög til sóma fyrir staðarhaldara sem og sveitarfélagið í heild og að í Árlundi hafi hjónin Ester Jónsdóttir og Theódór Guðjónsson ræktað upp fagran og mjög sérstæðan trjálund við afar erfiðar aðstæður á sandlendi í nágrenni við Atlantshafið. Árangurinn er einstakur og vel til þess fallinn að vera hvatning á landsvísu um hvað megi gera á stöðum sem flestir myndu telja vonlausa til trjáræktar. Húsakostur, aðkoma og heimahlað er mjög til fyrirmyndar. Hugkvæmni, alúð, iðni og snyrtimennska eru þarna lykilorð.
Verðlaunin veittu Almar Sigurðsson, Hafsteinn Hafliðason og Sigurður Guðmundsson Umhverfisnefnd Flóahrepps ásamt Margréti Sigurðardóttur sveitarstjóra.