Kynningarfundur Þjórsársveita

Framkvæmdanefnd verkefnisins Þjórsársveita hélt opinn kynningarfund á Laugalandi í Ásahrepp að kvöldi 25. nóvember. Var það til samræmis við vilja Framkvæmdanefndar að starf hennar eigi að vera opið og gagnsætt íbúum sveitarfélaganna. Á fundinn mættu góðir gestir þó að ósekju hefðu fleiri íbúar mátt láta málið sig varða.

Fundinum stjórnaði Eydís Þorbjörg Indriðadóttir, oddviti og sveitarstjóri gestgjafanna. Kynnti hún Örn Þórðarson, sveitarstjóra Rangárþings ytra, sem hélt ávarp fyrir hönd Framkvæmdanefndar og endaði mál sitt á að lesa upp ályktun um atvinnumál frá ársþingi SASS fyrr í mánuðinum. Í ályktunni kemur fram: “…lýsir ársþing SASS 2008 því yfir að ekki verði fallist á að sunnlensk orka verði nýtt til stóriðjuuppbyggingar utan landsfjórðungsins. Auðlindanýting og orkuframleiðsla á Suðurlandi krefjist fórna, sem ekki er ásættanleg, nema með áþreifanlegum ávinningi fyrir sunnlenskt samfélag.”

Því næst kynnti Hrafn Þórðarson, verkefnisstjóri Þjórsársveita, stöðu verkefnisins, hvað hefði verið gert og hvaða verk biði Framkvæmdanefndar. Í máli sínu lagði hann helsta áherslu á nýútkominn bækling Þjórsársveita sem ætlunin er að nýta vel á komandi mánuðum til að kynna markmið Framkvæmdanefndar um uppbyggingu atvinnutækifæra í orkufrekum iðnaði innan Þjórsársveitarfélaganna. Bæklingurinn er aðgengilegur hér á vef Þjórsársveita.

Að loknum erindum var efnt til opinna umræðna um verkefnið Þjórsársveitir með fundargestum. Voru þær með ágætum og líklegar til að stuðla að því að sem víðtækust sátt náist um markmið Framkvæmdanefndar. En Framkvæmdanefnd ítrekaði enn og aftur að verkefnið Þjórsársveitir skal ekki túlka sem stuðning við virkjanaframkvæmdir í Þjórsá. Markmið Framkvæmdanefndar miðast við að ef til þess kemur að virkjað verður í Þjórsá eigi að starfa að því markmiði að orkan nýtist til atvinnuuppbyggingar við uppsprettu sína.

Fundargestir komu með margar gagnlegar ábendingar um nýtingu orkunnar, ekki síst til að hlúa að undirstöðuatvinnuvegi sveitarfélaganna. Orka Þjórsár getur hæglega nýst í landbúnaði og full ástæða til að skoða þau mál til hlítar. Almennt voru fundargestir ánægðir með að sjá sveitarfélögin fjögur starfa saman sem eitt og lýstu ánægju sinni með það. Voru nefndarmenn hvattir til þess að halda samstarfi sínu áfram og hlúa að því.

Kynningarbæklingur Þjórsársveita

Kynningarfundur Þjórsársveita

Þjórsársveitir kynntu í dag markmið mitt sitt um nýtingu orku Þjórsár til atvinnuuppbyggingar í orkufrekum iðnaði við uppsprettu orkunnar. Þjórsársveitir eru verkefni sem Framkvæmdanefnd Þjórsársveita stendur fyrir en nefndin er skipuð af sveitarstjórnum sveitarfélaga sem eiga lönd að bökkum Þjórsár. Sveitarfélögin eru: Ásahreppur, Flóahreppur, Rangárþing ytra og Skeiða- og Gnúpverjahreppur.

Fyrr á þessu ári komu sveitarstjórnir Þjórsársveitarfélaganna sér saman um að bjóða atvinnutækifærum í orkufrekum iðnaði aðstöðu til uppbyggingar í sveitarfélögunum, ef af virkjun verður. Til að koma markmiðinu í framkvæmd voru oddvitar og sveitarstjórar Þjórsársveitarfélaganna skipaðir í Framkvæmdanefnd. Til langs tíma hefur hið geysimikla afl sem í Þjórsársveitum býr verið virkjað til flutnings til annarra þéttbýlli landsvæða þar sem orkan er nýtt, að miklu leyti í orkufrekum iðnaði. Fyrirhugað er að virkja nokkur hundruð MW til viðbótar á Þjórsársvæðinu. Það er samdóma álit sveitarstjórnanna fjögurra að kominn sé tími til að orka sveitarfélaganna nýtist til atvinnuuppbyggingar í heimahéraði.

Framkvæmdanefnd telur að ekki einungis séu réttlætisrök sem styðji markmið sitt. Markmiðið er einnig stutt af hagkvæmnis- og áreiðanleikarökum. Nýting orku við uppsprettu spari umtalsverðar fjárhæðir við uppsetningu og rekstur raforkuflutningsvirkja, auk þess sem minni hætta sé á töfum í afhendingu. En flutningur raforku er viðkvæmur þáttur í keðjunni frá uppsprettu til framleiðslu. Framkvæmdanefnd stendur einhuga að markmiði sínu og telur að samstaða sveitarfélaganna í málinu sé til þess fallinn að auðvelda fjárfestum að nýta orkuna í sátt og samlyndi við nágrenni sitt og íbúa þess.

Framkvæmdanefnd hefur látið útbúa fyrir sig kynningarefni, bækling og heimasíðu, til að stuðla að markmiði sínu. Bæklingurinn hefur verið gefinn út bæði á íslensku og ensku fyrir fjárfesta sem áhuga hafa á nýtingu orku Þjórsársveita. Við tekur umfangsmikið kynningarátak á verkefninu Þjórsársveitir – uppspretta orkunnar. Kynningarefni Þjórsársveita er aðgengilegt á vefslóðinni: www.thjorsarsveitir.is.

Kynningarfundurinn var haldinn í Árnesi, félagsheimili Skeiða- og Gnúpverjahrepps, og mættu þar sveitarstjórnir Þjórsársveita, fulltrúar Landsvirkjunar, fulltrúar frá iðnaðarráðuneytinu og hluthafandi fyrirtæki og stofnanir auk fjölmiðla. Kynningarfundurinn fór fram með miklum ágætum undir styrkri stjórn Sigurðar Jónssonar, sveitarstjóra Skeiða- og Gnúpverjahrepps. Á fundinum flutti Örn Þórðarson, sveitarstjóri Rangárþings ytra, ávarp frá Framkvæmdanefnd Þjórsársveita þar sem farið var yfir sjónarmið Framkvæmdanefndar og markmiðið um atvinnuuppbyggingu við uppsprettu ítrekað. Verkefnastjóri Þjórsársveita, Hrafn Þórðarson, kynnti kynningarefni sem unnið hefur verið fyrir Framkvæmdanefnd og mun vera grundvöllur þess kynningarstarfs sem framundan er.

Sérstakur gestur kynningarfundarins var Friðrik Sophusson, forstjóri Landsvirkjunar, sem fór yfir stöðu virkjanaundirbúnings á Þjórsársvæðinu. Í kynningu Friðriks kom fram að undirbúningur virkjanna væri í góðum gangi þótt ekki væri búið að taka lokaákvörðun um framkvæmd þeirra. Fyrirhugaðar virkjanir á Þjórsársvæðinu væru með stærri framkvæmdum á Íslandi og eðlilegt að búa svo í haginn að framkvæmdir sættu ekki töfum vegna undirbúningsleysis Landsvirkjunar ef ákveðið verður að ráðast í þær. Fyrir stæði að hefja útboðsvinnu vegna fyrirhugaðra virkjana á næsta ári og í raun þegar búið að bjóða út vél- og rafbúnað virkjanna fjögurra. Stefnt er á orkan geti verið tilbúin til afhendingar á árunum 2012-2014. Í máli sínu vék forstjórinn þó að því að þessar tímasetningar væru háðar fjármögnun og sölu til orkunotanda.