Sorpmál munu taka miklum breytingum á næstunni en Sorpstöð Suðurlands stefnir að því að loka urðunarsvæði sínu í Kirkjuferjuhjáleigu samkvæmt samningi við sveitarfélagið Ölfus, 1. desember 2009. Sorpstöðin hyggst fara í samstarf við Sorpu, Kölku á Suðurnesjum og Sorpurðun Vesturlands um lausnir í úrgangsmálum til ársins 2020. Hugmyndir eru um uppbyggingu aðalstöðva fyrir gasgerð/jarðgerð og brennslu á höfuðborgarsvæðinu og er Álfsnessvæðið talinn áhugaverðasti kosturinn fyrir slíka starfsemti. Móttöku og umhleðslustöðvar verði staðsettar í landshlutunum en sorpið síðan keyrt til frekari vinnslu/urðunar á Álfsnes.
Sveitarstjórn Flóahrepps hefur undanfarnar vikur verið að skoða aðra möguleika, s.s. það að gera samning við Íslenska Gámafélagið um leiðir í sorphirðu sem henta fyrir dreifbýlissveitarfélag á borð við Flóahrepp.
Íbúar munu taka virkan þátt í flokkun sorps og reiknað er með að 60-70% alls heimilssorps fari í endurvinnslu. Lausnin felst í því að flokka allt sorp í þrjár tunnur, eina tunnu fyrir lífrænan úrgang, eina tunnu fyrir allt endurvinnanlegt sorp og eina tunnu fyrir sorp sem þarf að jarðgera.
Þessi aðferð er notuð í Stykkishólmi með góðum árangri.
Sveitarstjórn samþykkti á fundi 4. júní s.l. að skrifað verði undir samning um sorphirðu, endurvinnslu og jarðgerð ásamt fylgiskjölum um verktilhögun og tilboð í hirðu á tunnum fyrir lífrænan úrgang, endurvinnanlegan og óendurvinnanlegan úrgang ásamt því að jarðgera lífrænan úrgang. Einnig var samþykkt tilboð í kynningu á breyttu fyrirkomulagi í sorphirðu.
Samningur gildir í fimm ár ár eða til ársins 2013.